ЦАХИМ НОМ

Д. Намдаг

Жүжиг, үргэлжилсэн үгийн зохиолч, яруу найрагч, найруулагч Донровын НАМДАГ (1911-1984) 1911 оны 10 сарын 20-нд Өвөрхангай аймгийн Тарагт суманд төржээ. 1920-оод оны үед Герман улсад суралцсан. 1930-аад онд Монголын үндэсний театрыг шинээр үүсгэн зохион байгуулах ажилд идэвхтэй оролцсон. Н. Гоголийн “Байцаагч түшмэл”, Лопе де Вегийн “Хонины булаг” зэрэг гадаадын болон “Учиртай гурван толгой” хөгжимт жүжгийг найруулан тавьжээ. 1964 онд Москва хотноо А.М.Горькийн нэрэмжит утга зохиолын дээд сургуулийн дэргэдэх дээд курсийг төгссөн. Сүхбаатарын одон, Алтан гадас одон медалиар шагнагдахын хамт 1962 онд “Цаг төрийн үймээн" романаараа, 1983 онд “Ээдрээ”, "Оролмаа эх” жүжгийн зохиолоороо Төрийн шагнал, 1969 онд “Наянчулууны ой” жүжгийн зохиолоороо МЗЭ-ийн шагнал, 1971 онд Урлагийн гавьяат зүтгэлтэн цол авчээ. 1934 оноос эхлэн зохиол бичих болжээ. Д.Намдаг бол Монголын орчин үеийн жүжгийн том зохиолчдын нэг. 1962-1984 онуудад Соёлын яаманд мэргэжлийн зохиолчоор дагнан ажиллажээ. Түүний туурвисан "Цаг төрийн үймээн” роман гадаад дотоодод ихэд нэрд гарчээ. Түүнээс гадна жүжгүүд нь Монголын театруудын тайзнаа олон жилийн турш тоглогдож үзэгчдийн өндөр үнэлэлт талархал хүлээн авсаар ирсэн юм. Түүний бичиж нэрд гарсан жүжгүүдийн дотор Гэсэр хааны тухай үлгэр домгоос сэдэвлэн зохиосон “Шарай голын гурван хаан” хөгжимт драмын жүжиг зохиогчийн нэр алдрыг өргөсөн юм. Тэр 1962 оноос орчин үеийн сэдэвтэй “Шинэ байшинд”, “Наянчулууны ой”, “Эрдэмтний яриа”, “Хангайн нуруунд, ‘Үр тариа”, “Сандралт арав хоног” түүхийн сэдэвт “Ээдрээ”, “Оролмаа” зэрэг жүжгийн зохиол, “Нүгэл буян” киноны зохиол, “Үр тариа” тууж туурвижээ. Намдаг бичихийн хажуугаар гэрийн шавь сургууль байгуулж жүжгийн зохиолч, шавь нар төрүүлжээ.

Зохиолч (орчуулагч)-ийн номууд

Өнөөдөр: 7515
Сүүлийн 7 хоног: 54539
Сүүлийн 1 сар: 256561
Нийт хандалт: 9585820