Зохиолч: Лу Сюнь
Орчуулагч: Ж. Артөр
Ангилал: Хятадын уран зохиол
Хэвлэлийн газар: Улсын хэвлэлийн газар
Хуучин хуанлийн оны хуучаар битүүн лугаа нэн төс буюу тосгонд бүү хэл тэнгэр огторгуйд ч шинэ жил айлссаны дохио илтэд тодорч үлбэгэр цагаан нүүгэлтсэн үүлсийн дунд үе үе гэгээ татан нижигнэсэн дуу залган авах нь Галын бурхныг үдэх галын наадам ажээ. Ойр тойрон пуужингийн дуу улам ширүүсэж, чих дөжрөм их чимээ үл тасран, агаарт дарийн үнэр ханхална.
Яг энэ орой би төрөлх суурин Луженьдээ эргэж ирж билээ. Төрөлх суурин гэхээс цаашгүй, энд гэр орон гэж байхгүй тул Лу Сы гуайнд түр буудаллахаар болов. Тэр хүн миний садан, надаас үе мултарсан, авга гэж хүндэтгэн нэрлэхээс аргагүй, даосын сургаал номлогч эрдэмтэн хүн байв.
Тэр хүн урьдынхаас ямар ч онцын өөрчлөлтгүй, яльгүй өтөлсөн, сахал самбайгаа хуссан, нүүр учруут хүйтэн хөндий байснаа намайг «таргалж» гэснээ өнөөх «шинэ намыг» ихэд харааж зүхэв. Намайг дайруулж хэлж байгаа биш Кан Ювейг хараасныг нь би мэдэж байлаа. Гэвч үг хэл авцалдаж өгдөггүй, асар удалгүй, би ганцаараа номын өрөөнд нь үлдэв...
