Баян залуу Балбар хэмээгч худалдаачин нь
Бас нэгийг олохын тул явж сүйдэв.
Бага эхнэр Мядагмаа хэдий үзэсгэлэн боловч
Бас эгж дахин гарч ичингүйрэв.
Шударгагүй арга мэхийг үүсгэж
Шулуун ардын журам ёсыг сүйтгэсэн,
Шулам хүн Думаа хүүхнийг үзэгчид
Шунал бузрын зуучид явахыг цээрлэ.
Ховдод байсан Ханд хэмээгч эхнэрийн бие
Хол газар харьд ирсний хойно,
Холбосон нөхөр Балбараа үхүүлж
Хожимд бас Раднаад очих нь сонирхолтой.
Тэнгэрийн зохиолоор хариуг аваад,
Тэнэж бас Тагнад хүрсний хойно,
Тэр эхнэр Мядагмааг дахин олсон нь
Тэнгэрийн журамт Буян түшмэлийн ач болой.
Онц сайхан үзэсгэлэн зүс нь,
Олонд нэгэн жигд үгүй тул,
Оюун төгс та минь бусдын хувьд бүү шунахайр.
Олсон түүнээс илүү гарч битгий сүйдэгтүн.
Угаас баялаг төрсөн Радна хэмээгчийн үлгэр энэ нь,
Урьдаас уламжилсан Сувдын цамцнаас төржээ.
Ухаан төгс нөхдийн зугаацалд зориулсан үүнийг,
Урвуулан найруулж цацруулсан нь Бодоо болой.
Гарчиг:
БЯЦХАН ОРШИЛ (ЛХАМСҮРЭНГИЙН БАТ-ОЧИР, ГҮМААШИРИЙН ЦЭРЭНДОРЖ)
ҮЙЛИЙН ЧАНАРЫГ ҮЛГЭРЛЭСЭН ҮЗЭМЖИТ ӨГҮҮЛЭЛ
ШҮРЭН ЭРИХНИЙ БҮЛЭГ
1991 оны хэвлэлийн Хэвлэн нийтлэлийн мэдээлэл
