Зохиолч: Нодар Думбадзе
Орчуулагч: О. Жамбалжамц
Ангилал: Гадаадын уран зохиол Шог хошин
Хэвлэлийн газар:
миний суудаг тосгон Гури хамгийн сайхан, хөгжөөн наргиантай нь билээ. Эмээ, Илико, Илларион, миний Мурада нохой бид хэд аж төрөн суумаар тийм тосгон өөр хаа ч байхгүй учир би тосгондоо хорвоод хосгүй хайртай.
Намайг ургах наран луугаа хүсэн хүлээсэн эмэг ээж, Илико, Илларион, Мери нарын зүг төрсөн тосгондоо буцаж явнам. Би гэртээ хариад байшингийнхаа өмнө усан үзмийн цэцэрлэг суулгаж гурван жилийн дараа «цоликаурийн» анхны ургац хурааж авна. Би тосгондоо аж төрөн амьдарч, хувьдаа байшинтай, хашаандаа Мурада нохойтой байх болно. Хайрт Меритэйгээ ханилан, арван хоёр хүүхэд төрүүлсний арван нэг нь хүү, нэг нь цэнхэр нүдэт хөөрхөн Цира охин байх болно. Би үе үе хот орж, эхнэр хүүхдэдээ элдэв бэлэг, ном авчирч өгдөг байна. Бас эмэг ээждээ нулимсаа гартал баярлахаар тийм сайхан бэлэг авчирна.
Илико, Илларион хоёрт ч бас намайг шоолж тохуурхахаа больтол нь сайхан бэлэг авчирна. Би Марта авгайд очиж, эмэг ээжийн бэлгийг хүргэж өгөхөд Марта авгай бас л баярын нулимсаа асгаруулах болно.
Дараа нь Илико, Илларион, Марта авгайтай цөмийг нь гэртээ суулгана. Тэгээд цөм хамт амьдрах болно. Би олон хүүхэдтэй, ач гуч нартай болно. Бид маш олуулаа, бүхэл бүтэн тосгоны чинээн олуулаа болно. Цаашлаад бид бүр олуулаа болж, дэвэн дэлхийгээр дүүрнэ. Бид хэзээ ч үхэхгүй, мөнхөд амьдрах болно...
