Зохиолч: Эрнест Сетон Томпсон
Орчуулагч: Б. Ринчен
Ангилал: Гадаадын уран зохиол Адал явдалт
Хэвлэлийн газар:
Манай тахиа, чингэлэг дотроос сэмхэн үгүй болдог болсоор сар илүү болжээ. Намайг Спринфильдэд амралтаар эргэж ирэхэд үүний учрыг нягтлан олж өгнө үү гэхэд нь удалгүй мөрдсөөр олсныг өгүүлэх нь:
Тахиа хонуурт авиран гарахаас өмнө үгүй болном бүлгээ. Үүнийг бодвол, тахиа хулгайлахад манай айл хөрш нар буюу тэнэмэл хүмүүс холбогдолгүй бололтой. Ууль тахиаг гагцхүү хонуур дээрээс хулгайлдаг. Хүрэн, суусар халиу бол тахиаг баримагц зогсоогоор идэж чингэлэгт өд ноолуур тэргүүтнийг үлдээдэг. Гэтэл манай тахиа, ор мөргүй алга болдгийг үзвэл хулгайч нь үнэгнээс зайлахгүй ажээ.
Үнэг чингэж манай тахиатай чингэлэгт байн байн алгасалгүй ирэхийг үзвэл, олон зулзагатай үнэг бололтой... Зулзагаа тэжээхийн эрхээр чингэж явсан биз. Үнэгийг эрж олсугай хэмээн тогтож, Ранчер нэрт анч нохойгоо үдэш дагуулан, голыг гаталж Эриндэлийн ойд ортол, нохой орчин тойронд эрэлхийлэн гүйв...
