Зохиолч: Хатгин Ц. Дамдинсүрэн
Орчуулагч:
Ангилал: Монголын уран зохиол
Хэвлэлийн газар: УЛСЫН ХЭВЛЭЛИЙН ХЭРЭГ ЭРХЛЭХ ХОРОО
Тэгээд тэнд хэд хонохдоо бид шөнө бүр анд мордож дахиж хоёр үнэг алж нэг үнэг шархтуулав. Үүнээс хойш анд дургүй байсан Эрэгжид бид хоёр үргэлж л ангийн тухай ярьдаг болов. Ёстой анч Цэвээн ангийн тухай их юм ярихгүй, харин бид хоёрыг ангийн дагалдан сурагчаа болгож чадсандаа сэтгэл ханасан бололтой инээмсэглэж байв. Минж шалгагдаж дутагдлаа илрүүлэхийн оронд зугаатай ан хийдэг болсондоо бас сэтгэл ханамжтай байна.
Нэг өдөр нар тунгалаг болмогц бид дөрвүүл машины дэргэд гурван шар үнэгээ сунгаж бариад гэрэл зургаа авхуулав. Гэрэл зургаа буулгаж үзэхэд дайснаа дарж дархан цолоо мандуулсан баатар эрс шиг бид дөрвийн царай цог жавхлан, баяр баясгалангаар дүүрэн харагдав.
