Зохиолч: Гунадаса Амарасекара
Орчуулагч: Д. Бадамням
Ангилал: Гадаадын уран зохиол
Хэвлэлийн газар: Улсын хэвлэлийн газар
— Удахгүй би дугуйтай ч болох юм бил үү.
— Чи мөнгө хаанаас олох юм бэ? Өчигдөр бас л хоёр рупи зээлдсэн. Бас өнгөрсөн сард Маддум Махаттаас авсан хоёр рупийн өр бий.
— Тэр чамд падгүй ээ гэж Сиядорис эхнэрээ зандраад: — Дахиад арван рупи л байвал дугуйтай болох юм чинь гээд ширээний араас босож унтлагын өрөө нимгэн хаалтаар тусгаарласан хавчиг жижигхэн тасалгаанд оров.
Сиядорис ширээнд ойртож ирээд, бүсэндээ үргэлж зүүж явдаг түлхүүрээрээ шургуулгыг нээж, болгоомжлон эргэж харснаа, шургуулгаас нь консервын лааз гаргаж ирлээ. Гурван жилийн турш үлэмжхэн бэрхшээлтэй хураасан хэдэн зоосоо түүндээ хадгалдаг байжээ. Цалин хөлс авах болгондоо тавин цент буюу бүтэн рупи хойш тавин хураадаг байлаа. Ийм лааз байдгийг гэр бүлийнхнээс нь хэн ч мэддэггүй байжээ. Хэрвээ эхнэр нь үүнийг мэдсэн бол аль хэдийнээ үрэн таран хийгээд дуусгачихсан байх байлаа. Сиядорис лаазтай мөнгөө сэмхэн тоолоод буцааж шургуулгадаа хийж цоожлов.
— Гучин таван рупи. Дахиад арав байвал ч! Дөнгөж аравхан рупи гэж дотроо тооцоолон бодсоор өрөөнөөс гарлаа.
