Зохиолч: В. А. Сильва
Орчуулагч: Д. Бадамням
Ангилал: Гадаадын уран зохиол Адал явдалт
Хэвлэлийн газар: Улсын хэвлэлийн газар
Жемисийг намхан нуруутайд нь бус арван хоёр настай ч гэсэн хүүхдийн гэнэн хонгор зангаасаа салаагүй, бичиг үсэг мэддэггүй, ажил төрөлд сураагүй болохоор нь тосгоныхон «Жаал» гэж нэрлэдэг байв. Ганц чаддаг юм нь гэвэл ямар нэгэн ёслолд зориулан цэцэг түүнэ. Жирийн ажил хэрэгт ухвар мөчид учраас Жемисийг эрдэнийн чулууг нууцаар олж худалддаг Ромел хөлслөн авсан байв.
Энэ Ромел гэгч бол олон хар хэрэг үйлдсэн адгийн үл бүтэх этгээд байлаа. Тосгонд хааяа үзэгдэнэ, тэгэхдээ ганган хувцастай, алт мөнгөн эдлэлээр гоёсон, торгон саронг[1], торгон цамцтай, тэр ч байтугай нусны торгон алчууртай явдаг. Тариачид түүнийг хараад «Ромел баяжчихаж, бас л нэг хүн дээрэмдэж дээ» гэж ярилцдаг байв. Гэвч Ромелийн хөрөнгө уддаггүй, сайндаа л хоёр гурван сар болдог байлаа. Алт мөнгө, торго дурдангаа мөрийтэй тоглоомд алдчихдаг байжээ. Тэгээд ор сураггүй алга болно.
Энэ удаа Ромел Жаалыг дагуулаад хэнд ч мэдэгдэлгүй улсын дархан цаазтай газар луу явжээ. Ромел эрдэнийн чулуу олддог уулыг сайн мэддэг Ранбанда гэдэг танилтай байжээ...
