Зохиолч: Картар Сингх Дуггал
Орчуулагч: С. Пүрэвжав
Ангилал: Энэтхэг зохиол
Хэвлэлийн газар: Улсын хэвлэлийн газар
Малан шинэ алчуур нөмөрч, хоёр бугуйндаа улаан бугуйвч зүүгээд сарны гэрэл тунарсан хашаанд гарлаа. Түүний бие нь чичирнэ. Гэнэт хаалга тогших чимээ сонсогдлоо. Энэ бол нөгөө хүний тогшилт байв. Чимээгүй, болгоомжтой, яаруу тогшив. Тэр амласан ёсоороо л иржээ... «Тэргэл сар гарах шөнө би танай хаалгыг тогшино. Онгойлгоё гэвэл тайлна биз. Үгүй гэвэл тайлахгүй байна биз. Би өөрт байдаг ганц эрхээ эдэлж чиний хаалгыг чинь л тогшино. За ийм л байна даа» гэж тэр бичсэн байв. Тэгээд одоо тэр аяархан, амттайхан, эелдэг тогшиж байна. Энэ яах аргагүй түүний тогшилт... Саруул шөнөөр гэтсэн хулгайч!.. Өтгөн хар үүл тэнгэрийг гэнэт бүрхлээ. Харанхуй, хурц гэрэл гарган асаж байсан лааг унтраачихсан юм шиг газар дэлхийг нөмөрлөө. Энэ харанхуй дундуур Маланы алхлах чимээ гарлаа. Харанхуй, хүйтэн... Тэрээр чичирсээр түлхүүрийг эргүүлтэл тэсэж ядан хүлээсэн хүний гар Маланг тэврэв. Хоёр уруул нийлэв. Удаан хугацаагаар баригдан саатсан урсгал даланг гэнэт сэт дайрч түүнийг хаман урсдаг шүү дээ...
