Зохиолч: Кикүчи Кан
Орчуулагч: Л. Баярмандах
Ангилал: японы уран зохиол
Хэвлэлийн газар: Улсын хэвлэлийн газар
Итикуро хойноос нь харна. Сэтгэлийг нь жигшил, зэвүүцэл бүрэн эзэмдэв. Алагдсан бүсгүйн гоёлыг хуу татахаар улайран гүйж буй тэр эмийг харахаас ой нь гутаж, хэзээ нэг цагт хайрлаж явснаа бодохоос улам ч зэвүүцнэ. Хүмүүсийг хайр найргүй алж, мөнгө хулгайлах зэргээр гараа бузарласан хар үйл нь тэгтэл ичгүүртэй булай санагдаж байсан удаагүй. Гэтэл одоо муухай явдлыг хөндлөнгөөс ажиглатал үйлдсэн хэргийнхээ аймшигтай, жигшүүртэй болохыг даанч тодорхой ойлгожээ. Хүний аминд хүрч авсан о-Юми, яст мэлхийн зүүлт, тав арван регоос болж бүсгүй хүний уян зөөлөн сэтгэлийг хөсөр хаян, амьтны сэг рүү ухасхийх цөөвөр мэт явчихыг хараад энэ шулмын үүрэнд ийм эмтэй цуг нэг ч хором тэвчиж сууж чадахгүй гэдгээ ухаарчээ. Итикуро үйлдсэн хамаг нүглээ дурсан санахаас зүрх нь шимширнэ. Боож алсан хүүхний нүд, цусандаа хутгалдсан худалдаачдын ёолох, илдэнд өртөн унах буурал өвгөдийн гинших дуу бүгд холилдон сонсогдож, жигтэйхэн гэмшлээ. Үйлдсэн хэргийнхээ аймшгийг мэдэрч сүрдэн дагжив. Хуучин амьдралаасаа чадвал шалавхан зайлъя! Өөрөөсөө ч зугтъя! Энэ бүх хар үйлийнх нь суурийг тавьсан хүүхнээс холдох хүсэл хамгийн их байжээ...
