Умард уулын оройгоор бараан манан оргин буцалж, шамарга цасан бөөм бөөмөөр хаялаад, эргэн тойрон харанхуйлж, дөрвөн зүгийг олохуйяа бэрх. Хөндий талыг хунгар цасан бүрхээд, хязгаар үгүй мөсөн далай болж, түүний дунд хүн мал орших байтугай, зэрлэг араатан зугтан зайлмаар буй. Тийн атал, тэртээ давааны үзүүр доор хоёр хар гэр овоолсон аргал мэт бүрэг бараг үзэгдэх бөгөөд ар талыг нь цасан хэдийнээ хөрзөнтөн хучиж, өмнө этгээдээс хаалга үүд нь нэг нүх адил харагдана. Улам ойртвоос, хот дотор нь хоёр, гурван туранхай үнээ хөндлөн гулд унаж, хошуугаа газар шаан хэвтээд, хаяанд нь нэгэн халтар нохой зогсон, баруун умарт зүг тийш нэгэн үе ульж, нэгэн үе хуцна.
Гэтэл...
