... Дэлхий нийтийн эрчим хүчний төвөөс ирсэн тушаал ёсоор бидний 8 хүн, тэнгисийн ёроолын урсгалаар ажиллах цахилгаан станцад ажиллах болжээ.
Усан харилцааны хөвөгч онгоц хараацайн хурдаар довтолсоор, тэнгисийн урсгалын цахилгаан станцын дээр ирж зогсоход гүнд шумбах битүү завь биднийг угтан ирлээ. Залуур зүйн жолоодлоготой энэ завь намуухан долгиолох мандлаас усны гүнд дүүгүүрийн чулуу адил шуугин оров. Цэлмэг тэнгэрээс тусах нарны туяа, усны гүнд орох тутам бүдгэрсээр завины өмнөх зурвас цагаан гэрлээс өөр сүүмийх ч гэгээгүй нам гүм цохилон цалгих давлагаа шуугиан ч үгүй харанхуй тайван давхаргыг туулж, өдрийн цагаан гэрлээр тунаран үзэгдэх тэнгисийн ёроолын урсгалын цахилгаан станцын бөмбөгөр орой руу хурдаа хассаар алгуурхан хүрч очмогц, станцын хамгаалах бүрхэвчийн 1 дүгээр хаалга огцомхон нээгдэж, бидний суусан шумбагч завь хөөсрөн цутгах далайн усны хамт ороод зогслоо...
