ДЕКАМЕРОНЫ ЗУРГАА ДАХЬ ӨДӨР ДУУСАЖ ДОЛОО ДАХЬ ӨДӨР ЭХЭЛЖ БАЙНА

НЭГ : Жанни Лоттеринги шөнө хаалга тогшихыг сонсоод эхнэрээ дуудаж сэрээсэнд эхнэр нь энэ чинь буг чөтгөр гэж хэлэв. Хоёул босож тарни уншсанд үүд тогшихоо болилоо.

ХОЁР : Перонеллын нөхөр нь гэртээ эргэж ирэв. Перонелла нууц амраг юугаан дарсны торхонд нуув. Нөхөр нь тэр торхыг худалдсан байхад эхнэр нь торхыг ондоо хүнд худалдсан, тэр хүн торхны хир бат бөхийг үзэх гэж дотор нь ороод байгаа гэж батлан өгүүлэв. Перонеллын нууц амраг торхноос гарч ирээд нөхөрт нь мөнгийг тоо ёсоор өгч, дараа нь торхыг гэртээ аваачив.

ГУРАВ : Ринальдо ламтан шавь бүсгүйтэйгээ алиалан наадах болов. Ринальдо ламтан бүсгүйн өрөөнд байж байгаад нөхөртэй нь тааралдахдаа загалмай зүүлгэсэн хүүгийн цагаан хорхойг тарнидан зайлуулж байсан юм гэж хариулав.

ДӨРӨВ : Нэгэн шөнө Тофано үүдээ түгжээд эхнэрээ гадаа орхиод эхнэрийгээ яаж гуйсан ч оруулахгүй байлаа. Тэгэхэд эхнэр нь худагт унаж байгаа дүр үзүүлэн худаг руу том чулуу хаяжээ. Тофаног гэрээсээ ухасхийн гарч, худаг руу гүйж очих тэр завсар эхнэр нь гэртээ ороод үүдээ түгжин нөхрийгөө олны шившиг болгов.

ТАВ : Нэгэн хартай эр санваартны дүрээр эхнэрийнхээ нүглийг наманчлав. Эхнэр нь түүнд нүглээ наманчлахдаа нэгэн санваартанд дурласан, тэр маань шөнө болгон над дээр ирдэг гэж хэлэв. Хартай эрийг гэрийнхээ үүдэнд нуугдан сахиж байх зуур эхнэрийн нь урьсан нууц амраг дээврээр орж ирээд өвөрт нь үлдэв.

ЗУРГАА : Изабеллаг Леонеттотой уулзаж байх яг тэр үед бүсгүйд дурласан мессер Ламбертуччо ирж, түдэлгүй нөхөр нь хүрч ирэв. Изабеллын хүссэнээр мессер Ламбертуччо өрөөнөөс хутга барин гүйж гарав. Нөхөр нь Леонеттог гэрт нь хүргэж өгөв.

ДОЛОО : Лодовико донна Беатричед дурласнаа хэлэв. Хүүхэн Эгано гэдэг өөрийн эр нөхөрт даашинзаа өмсгөөд цэцэрлэгт явуулж, тэр хойгуур өөрөө Лодовикотой амраглан цэнгэв. Дараа нь Лодовико босч, цэцэрлэгт очоод Эганог нэвширтэл жанчлаа.

НАЙМ : Нэгэн эр эхнэрээ харддаг байв. Эхнэр нь өөрийн нууц амрагийн ирсэн эсэхийг мэдэх гэж хуруундаа утас уядаг байлаа. Нөхөр нь маллуулж байгаагаа мэдээд нууц амрагийн нь хойноос мөрдөн хөөж байх зуур эхнэр нь орондоо өөр хүүхэн хэвтүүлэв. Нөхөр нь тэр хүүхнийг хэмх балбаж, үсийг нь хяргаад хадам ах нартаа очиж хэлэв. Тэд нар түүний худал хэлснийг үзээд хараахын муугаар хараан зүхэв.

ЕС : Никостратын эхнэр Лидия, Пиррд дурлав. Пирр тэр хүүхний үнэн сэтгэлтэй эсэхийг мэдэхийн тулд гурван болзол тавьсанд Лидия гурвуулыг нь биелүүлж, үүний дээр Никостратын дэргэд Пирртэй алиалан наадаад Никостратад болохоор тийм юм огт болоогүй мэтээр батлан итгүүлэв.

АРАВ : Сиена хотын хоёр залуу нэгнийхээ загалмай зүүлгэсэн хүүгийн эхэд дурлав. Загалмай зүүлгэсэн эцэг гэнэт нас барж, урьд өгсөн амлалт ёсоор нас барсны дараа найз дээрээ эргэн ирж, хойд насны амьдралын тухай ярив.