ДЕКАМЕРОНЫ ЕС ДЭХ ӨДӨР ДУУСАЖ СҮҮЛЧИЙН, АРАВ ДАХЬ ӨДӨР ЭХЭЛЖ БАЙНА

 Панфилогийн захиран засагласан эл өдөр янаг амрагийн явдал хийгээд ер аливаа ажил үйлст өгөөмөр сэтгэл, өршөөл энэрлээ харуулсан хүмүүсийн тухай туурийг толилуулна

НЭГ : Нэгэн рыцарь баатар Испанийн ван эзний албанаа ороод өөрийнх нь гавьяа зүтгэлийг ван эзэн тоож үнэлэхгүй байна гэж дүгнэв. Үүнд вангийн буруу байхгүй, гагцхүү рыцарь баатрын заяа тавилан тийм байсан гэж ван эзэн туршлага дээр маргашгүй нотлоод дараа нь рыцарь баатарт урьд үзэгдээгүй өгөөмөр их хишиг хайрлав.

ХОЁР : Гино ди Такко, Клюнийн ширээтийг олзлон барьж аваад түүний ходоодны өвчнийг эмчлэн эдгээж, дараа нь тавьж явуулав. Ширээт Ромын ордонд буцаж очоод Гино ди Такког пап Бонифацитай эвлэрүүлж, Гино нь мөргөлчдийг хүлээн авах шадар лам болжээ.

ГУРАВ : Натаны өгөөмөр баянд атаархсан Митридан түүнийг алахаар очиж, Натантай уулзаад түүнийг танилгүй, санасан хэргээ хэрхэн гүйцэлдүүлбэл дээр вэ гэдгийн тухайд Натанаас өөрөөс нь мэдээлэл аваад дараа нь мөн Натаны өөрийн нь зөвлөснөөр түүнтэй төгөл модонд болзож уулзав. Митридан эцэст нь Натаныг таниад ичиж зовсондоо сэтгэл нь шаналж, сүүлдээ түүний дотнын анд болжээ.

ДӨРӨВ : Мессер Жентиле де Каризенди Моденыг орхин үхсэнд тооцож оршуулсан өөрийн сэтгэлт бүсгүйг бунхнаас гаргаж авав. Хүүхний бие илаарь болж, хүү төрүүлсэнд мессер Жентиле түүнийг хүүхэдтэй нь хамт эр нөхөр Никколуччо Каччанимикод нь буцааж өгөв.

ТАВ : Донна Дианора мессер Ансальдоос өвлийн дунд сард хаврын сүүл сарынхтай адил сайхан цэцэрлэг ургуулж өгөхийг хүсэв. Мессер Ансальдын хөлсөлж авсан нууц тарничийн эрдэм чадлын ачаар цэцэрлэг урган цэцэглэв. Эр нөхөр нь донна Дианорад мессер Ансальдын хүслийг хангахыг зөвшөөрөв. Гэтэл мессер Ансальдо нөхрийн нь дэлгэрэнгүй сайхан сэтгэлийг мэдээд эхнэрийнх нь амласнаа биелүүлэхгүй байхыг зөвшөөрч, нууц тарнич өөрийн ээлжид мессер Ансальдоос хөлс мөнгө авсангүй.

ЗУРГАА : Ялагдашгүй Их Карл ван нэгэн бүсгүйд дурлажээ. Эзэн ван гэнэн омтгой авирласандаа ичингүйрэн тэр бүсгүй, түүний дүү хоёрыг сайн хүмүүстэй суулгажээ.

ДОЛОО : Педро ван өөртөө өвчтэй бүсгүй Лизагийн халуун сэтгэлээр дурласныг олж мэдэв. Асар удалгүй ван эзэн бүсгүйг сурвалжит язгууртан залуутай суулгаж, бүсгүйн духан дээр үнсээд тэр өдрөөс хойш өөрийгөө бүсгүйн журмын нөхөр рыцарь гэж нэрлэх болов.

НАЙМ : Софрония өөрийгөө Гисипптэй ханилан суусан гэж боддог боловч жинхэнэ хэрэг дээрээ Тит Квинций Фульвийн гэргий байсан бөгөөд Тит Квинция Фульвтэй хамт Ром орохоор явж, хэсэг хугацааны дараа Гисипп тийшээ үгээгүй ядуу болоод дүрээр очив. Титийг өөрийгөө эс тоомсорлосон хэмээн бат итгэсэн Гисипп үхэхийн хүслэн болж, шүүхэд хүн алсан хэмээн мэдүүлэв. Тит Гисиппийг таниад түүнийг ялаас мултлахын тулд тэр хүнийг Гисипп алаагүй, Тит өөрөө алсан гэж мэдүүлэв. Тэгэхэд нь жинхэнэ алуурчин гэмт хэрэг үйлдсэнээ улайн мэдүүлж, үүний дараа Октавиан бүгдийг нь суллан тавьж явуулав. Тит өөрийн дүү бүсгүйг Гисиппэд эхнэр болгон өгч, өв хөрөнгөө түүнтэй хуваалаа.

ЕС : Худалдаачны дүрээр аялан жуулчилж явсан Саладиныг мессер Торелло баярын царайгаар угтан золгов. Загалмайтны аян дайн болж, мессер Торелло дайнд мордохдоо эхнэртээ өөр хүнтэй сууж болох хугацааг товлон тогтоож өгөв. Мессер Торелло дайсны цэрэгт олзлогдов. Түүний шувуу сургах эрдэм чадлын тухай сураг Саладины чихэнд хүрэв. Саладин мессер Тореллог таньж, өөрийнхөө нэрийг хэлээд түүнийг ер бишийн их хүндэтгэн өргөв. Мессер Торелло өвчин тусч, нэгэн шөнө ид шидийн хүч нөлөөгөөр Павиод очив. Эхнэр нь өөр хүнтэй суухаар хурим найр хийж байхдаа мессер Тореллог таньж, мессер Торелло эхнэрээ өөрийн гэрт аваачив.

АРАВ : Салуццийн бээлийг харьяат нар нь эхнэр ав гэж ятгах болов. Бэйл эхнэр болох хүнээ өөрөө олно гэж хэлээд тариачны охинтой суув. Эхнэр нь түүнд хоёр хүүхэд төрүүлж өгөв. Бэйл ноён эхнэртээ хоёр хүүхдийг нь алсан гэж үнэмшүүлээд дараа нь чамаас уйдаж залхлаа, өөр эхнэр авна гэж хэлэв. Эхнэр нь дан цамцтай, төрхөмдөө буцаж очлоо. Бэйл ноён охиноо авчруулж, хүн бүхэнд түүнийг өөрийн болзоот бүсгүй гэж хэлж байлаа. Эцэст эхнэр нь энэ бүхнийг хүлцэн тэсвэрлэж байгааг үзээд эхнэртээ урьд урьдынхаас улам их хайртай болж, гэртээ буцаан авчирч, энэ завсар өсөж өндийсөн хүүхдүүдийг нь үзүүлж, үүнээс хойш эхнэрээ ихэд хүндэтгэх болж, бусдад ч гэсэн бээлийн хатан хэмээн хүндэтгэж байхыг тушаан захирав.

ЗОХИОГЧИЙН ТӨГСГӨЛИЙН ҮГ