Ази тивийн олон бага улсын дотроос Монгол мэт, олон эрдэмтний анхаарал татаж, түүх хэл бичгээ судлуулсан нь ховор гэж хэлж болно. Монголын түүх соёл хэл зохиолыг судалсан эрдэмтэн, дэлхийн бөмбөрцгийн булан бүрд байгааг бид баярлан тэмдэглэж, тэр олон эрдэмтний ариун сайхан ажил хөдөлмөрийг амжилттай болоосой гэж ерөөн хүсэж байна. Монгол хэл бичгийг Монгол, Орос, Мажар, Герман, Япон, Америк, Фин зэрэг олон газрын эрдэмтэн судалж, үлэмжхэн үнэтэй чухал бүтээл гаргасныг хэн бүхэн мэдсээр буй. Энэ талаар хийсэн ажил үлэмж байвч, цаашид хийвэл зохих шаардлагат ажил зорилго нэн ч үлэмжхэн байна.
Юуны өмнө, Монголын судлалыг эрхлэх газрын хоорондын харилцаа, монголч эрдэмтний хоорондын харилцааг сайжруулах нь чухал байна. Хэн ямар зүйлийг судалж байгаагаа харилцан мэдэлцэж, Монголын хэл бичгийн судлалын хоцрогдсон чухал хэсгийг олж, түүнд гол анхаарлаа тавих зэргээр монголч эрдэмтний ажил бүтээлийг зохицуулбал, монгол хэл бичгийн судлал улам амжилттай болно.
Монгол уран зохиолын түүх одоо хүртэл бичигдээгүй учраас, оюутан залуусыг өв соёлтой танилцуулан хүмүүжүүлэх ажил их орхигдож байна. Иймийн тул, монгол уран зохиолын судлалын нэгэн гол зорилго бол уран зохиолын түүхийг зохиох явдал болно...
