Өвөр монголын зохиолч, тал нутгийн эрдэмтэн (нутаг хошууны түүхээ судалдаг, хүрээлэнгүүд, их дээд сургуульд багшилдаггүй чөлөөт түүхчдээ ийн нэрлэдэг) Боржигон Аминбөхийн Лхамжав гуайн ”Улаан хувьсгал” хэмээх ном анхан 2012 онд хэвлэгдсэн даруйд нь уншиж байлаа. Маш сонирхолтой ном байсан учраас явах бүртээ хэд хэдэн ширхгийг өөрийн чадахын хэрээр хүмүүст уншуулахаар авчирдаг байлаа.
2015 оны зун Лхамжав гуайтай нүүр учран золгож, энэхүү номыг Монголын уншигчдад хүргэх ам авснаас хойш 2 жил өнгөрчээ. Нэлээдгүй гар бичмэлүүд нэмэгдсэн болоод, зарим нэг зүйлийг сайн ойлгохгүй учраас нэлээн алдаатай хэвлэгдлээ. Тийм ээ? Маш их алдаатай болсон. Хэдий үг үсэг, нэр томьёоны алдаатай боловч утгын эндүү гарахгүй болов уу? Бас алдаагүй болгон хүргэх болно. Лхамжав гуай энэ номоо бичихийн тулд хэд хэдэн мотоцикл, нэг машин элээж, 20 гаруй жил зарцуулж, 500 орчим амьд гэрчтэй уулзжээ. Маш сайн бичсэн ном.
Яагаад бид энэ номыг унших ёстой вэ? Бид 1937 оны хэлмэгдүүлэлтийнхээ тухай ийм дэлгэрэнгүй, нарийн ширийн амьд гэрчүүдийн баримттай ном хийж чадаагүй. Мөн Александр Солженицын-ы ”Гулаг олтриг” хэмээх номыг уншсан хэн ч болов коммунизмын аймшигт устгалын тухай хэдийн уншжээ. Энэ бол өнгөрсөн зууны сүүлийн хагаст 10 гаруй жил үргэлжилсэн аймшигтай үйл явдал. ӨВӨР МОНГОЛ ГУЛАГ хэмээн нэрлэж болно. Хэрвээ бид ийм номыг уншиж, бага сага ч болтугай мэдэж гэмээ нь өөрсдийн газар нутаг, өөрсдийн бие, өөрсдийн энэ амьдралдаа ийм зүйл дахин гарахаас сэргийлж чадах юм.
Төвөд, Өвөр Монголын Соёлын их хувьсгалд өртсөн ул мөр хэзээ ч арилахгүй. Бас хэзээ ч эдгэхгүй. Ийм л гашуун түүхийг уншлаа. Юу гэдэг билээ. Бүү март. МАРТВАЛ СӨНӨНӨ. Ийнхүү Соёлын хувьсгалын тухай номуудыг цааш цувралаар хүргэх бөгөөд Төвөдөд хэрхэн болж өнгөрсөн тухай бас хүргэх болно.
Г. Ням-Очир
Энэхүү номыг цаасан хэлбэрээр худалдаж авах бол 99283865 утсаар захиалж хүргүүлнэ үү.
Дэлгэрэнгүй мэдээллийг https://www. facebook. com/GreatCulturalRevolution
