Зохиолч: Фумико Хаяси
Орчуулагч: Д. Өлзийсайхан
Ангилал: японы уран зохиол
Хэвлэлийн газар: Улсын хэвлэлийн газар
Орой таван цагийн үед очно гэж Табэг хэлэхэд, сүүлчийн уулзалтаас хойш бүтэн жилийн дараа ийнхүү утасдсанд гайхсан Кин авгай харилцуураа тавьж цаг харлаа. Тав хүртэл одоо хоёр цагийн зай үлджээ. Давын өмнө усанд орж амжих хэрэгтэй. Кин, зарц бүсгүйд оройн хоол эртхэн бэлтгэхийг тушаагаад халуун усны өрөөнд яаран орлоо. Нэг жилийн өмнө салсан үеийнхээсээ залуу харагдах ёстой. Өөрийгөө хөгширсөн гэдгийг Табэд мэдэгдэж хэрхэвч болохгүй. Чавганц шиг харагдвал ялагдал хүлээснээс ялгаагүй.
Кин авгай халуун усанд аажим умбаж, дараа нь халуун усны өрөөнөөс гарч хөргөгчөөс мөс яаруу авч жижиглэн бутлаад нимгэн сиймхий даавууг хоёр давхарлан дотор нь ороож толины өмнө арваад минут нүүрэндээ хичээнгүйлэн иллэг хийв. Нүүрээ улайтал нь арчиж арьс нь мэдрэх чадвараа алдчих шиг боллоо. Одоо тавин зургаа хүрсэн шүү дээ гэсэн бодол Киний толгойноос гарахгүй зуурч, гэхдээ их юм үзэж хаширжсан, арга баширтай эмэгтэй сандарч тэвдэхгүйгээр насаа дарж чадна гэж бат итгэжээ...
