Лусиано ажил эрж нутаг усаараа хэржээ. Тэр гэр орноо өлсгөлөнгөөс түр зуур ч атугай аврахын тул ямар ч ажлаас буцахгүй байжээ.
Тэр хавийнхаа бүх эдлэнг тойрсон авч нэмэр болсонгүй. Түүнийг ажилд авах газар ер олдсонгүй. Хөөрхий Лусианогийн эрүүл мэнд хүч чадлыг цагаан будааны талбайн намаг нэгэнт сорон хоцорчээ. Тэр ажил олох найдвар тасарч цөхрөнгөө бараад ранчодоо суухаар шийджээ. Тэнгэрийн сайханд гадаа гарч ханаа түшин хавдсан хөлөө наранд ээн удтал дуугүй, хөдөлгөөнгүй сууна. Харин шөнө аймшигт зүүд зүүдлэн гэнэт сэрэхэд халууран чичирч, нүд нь хоовон дахь нүүрс шиг улалзана.
Тэр нэг өглөө босож чадсангүй. Саа туссан хөл нь мэдээгүй болж орноосоо босохыг бүр больжээ...
