Зохиолч: Саадат Хасан Манто
Орчуулагч: Д. Бадамням
Ангилал: Гадаадын уран зохиол
Хэвлэлийн газар: Улсын хэвлэлийн газар
Адууны хорооны дэлбэгч нарын дунд Мангу хамгийн ухаантай, хамгийн их мэдлэгтэйд тоологддог байлаа. Боловсрол огт үгүй, сургуульд сураагүй хүн боловч Мангу юм бүхнийг мэдсэн, дуулсан байдаг. Хэрвээ нөхдийн нь нэг дэлхий дахины улс төрийн байдлын талаар сонирхвол ганц Мангу багшаас асуух бөгөөд асуултдаа ч хангалттай хариу авна.
Аль дээр үед бүр Испанийн дайны тухай яриа дөнгөж дэгдэж байх цагт Мангу зорчигчдын ярианаас энэ тухай сонсчхоод өөрийн найз Гам Чоудхрийн өргөн мөрийг алгадан зөнч мэргэн байдлаар хэлсэн нь:
— Чи миний үгийг санаж ав. Испанид юу юугүй дайн гарах нь байна шүү.
— Испани чинь хаана байдаг юм бэ? гэж Гам Чоудхрийн асуухад жишим ч үгүй:
— Гадаадад байдаг, өөр хаана байх вэ дээ гэж хариулсан гэдэг...
