Зохиолч: Мао Дүнь
Орчуулагч: Ө. Гүрсэд
Ангилал: Хятадын уран зохиол
Хэвлэлийн газар: Улсын хэвлэлийн газар
Энэ удаагийн хонжворын догшин салхи намдаж, сохроор мөнгө гаргаж байсан хүмүүс ширүүн цохилт хүлээлээ. Ү Сүньфүг тэр өдөр банкны нийгэмлэгийн ресторанд хоол идэж байхад хажуугийн ширээн дээр нь сууж байсан гурван хүн нь мөн энэ цохилт хүлээгсдийн тоонд оржээ. Тэдний дотроос нөгөө ширвэгэр сахалтай, тавь орчим насны Фэн Юньчин гэгч нь бусдаасаа илүү хохирчээ.
Хагас жилийн өмнө энэ өвгөн өөрийнхөө нутагт баян чинээлэг, тарган цатгалан, амар жимэр амьдарч байлаа. Манж улсын үеэс эхлэн нутагтаа язгууртны эгнээнд багтаж байсан Фэн Юньчин гэгч нь өндөр хүүтэй зээллэгээр нутгийн тариачдыг шулан мөлжиж, газар нутгаа өргөжүүлж байсан бил ээ.
Тэр мөнгөн зээллэгийг тариачдад өгөхдөө мөнгөө буцааж авдаггүй, тариачны газраас нь авдаг. Иймээс түүний зээлүүлсэн тав, арван төгрөг нь нэг, хоёр жилийн дараагаар тав, арван му газар болон хувирна. Иймэрхүү явууллага хятадад их өргөн дэлгэр байсан боловч Фэн Юньчин бол нэртэй, “Инээдэг бар” нэртэй “Холын бодлогоч харцага” байсан бөгөөд өндөр хүүтэй зээллэгээрээ тариачдыг мөлжихдөө их овтой, нарийн арга хэрэглэж чаддаг, ёстой аалз шүлсээрээ хорхой шавж барихын адил, тариачдыг өөрийн урхиндаа тун чадамгайгаар оруулан, түрээслэгч болгох буюу төлөх хөрөнгөгүй нэгийг нь боол болгон үхэр мал шиг зарцалдаг ажээ...
