Би өөрийнхөө лекцэд Японы "ацан санаа" гэж нэрлээд байгаа юм бол өнөөгийн эринд туждаа дэлгэрсэн нэгэн зүйл архаг өвчин юм. Японы эдийн засгийн хөгжил цэцэглэл нь дэлхийн эдийн засгийн бүтэц, байгаль орчныг хадгалж хамгаалах үүднээс аваад үзвэл бодитой байж болох элдэв аюулаас ангид байгаагүй юм. Энэ утгаар "ацан санаа" улам хурдсах янзтай юм шиг байна. Энэ байдал бидний дотооддоо мэдэрдгээс дэлхий нийтийн шүүмжлэлт хараанд илүү илэрхий байдаг байж ч мэднэ. Дайны дараах эдийн засгийн доройтлын ёроолд байхдаа бид сэргэн босох найдвараа хэзээ ч гээлгүй, чухамхүү тэндээс түүнийг даван туулах сэтгэлийн хүчийг олсон юм. Ингэж хэлэхэд хачирхалтай сонсогдож магадгүй, гэхдээ бид өнөөгийн хөгжил цэцэглэлээс үүдсэн ёозгүй үр дагаврын талаарх түгшүүр зовнилоо тэсэж давахад дээрхээс дутуугүй сэтгэлийн тэнхээ гаргах ёстой болж байна. Өөр нэг үзлийн үүднээс харах аваас Японы хөгжил цэцэглэл бүхий л Азийн үйлдвэрлэл, хэрэглээ хоёрын өсөн нэмэгдэж буй хур хүчинд багтах ёстой болж байгаа шинэ нөхцөл байдал одоо бүрэлдэж байх шиг байна...
