Тэр ахархан хугацаанаас миний амьдралын хамгийн их явдалтай үе эхэлсэн байна. Хүүхэд байхдаа би даанч балчир учраас л дайнд явж чадахгүй хоцорлоо гэж уйлдаг байж. Харин энэ бол миний амьдралыг хамгийн их явдалтай байсан гэж хэлэхэд хэцүү зүйл байлаа. Дөчин таван оны зун муухан радио хүлээн авагчаар манай халуун хөндийд эзэн хааны дуу хоолой хадсан тэр цагаас эхлэн миний амьдралын хамгийн их явдалтай үе эхэлсэн бөгөөд өнгөрсөн бүх үе маань ямар нэг тодорхой биш, тогтвор тойм нь үл мэдэгдэх тийм юм санагдан хав харанхуй хүйтэн цээлийн ёроолд шингэх шиг болж бил ээ. Тэгээд л тэр үеэс эхлэн миний амьдралын соронзонгийн талбай өнгөрсөн үеийнхээ эсрэг хүчээр цэнэглэгдсэн юм. Хуучин нь диваажин болж хувирах нь тэр. Хүчирхэг, сайхан, гялалзсан дайнд оргилж байсан хүүхэд ахуй цаг... Гар хөндөөгүй үлдсэн диваажин...
