Зохиолч: Брээм Чанд
Орчуулагч: Ж. Гэндэндарам
Ангилал: Энэтхэг зохиол
Хэвлэлийн газар: Улсын хэвлэлийн газар
Ийшвар бол том газрын баян эзний танхил хүү.
Би бол хөлсөө цувуулж хүчээ шавхан олсон хэдхэн зоосоороо бор хоногоо өнгөрөөхөөс өөр самбай ч байхгүй хөөрхий бичээчийн хүү. Бид хоёр үргэлж марган цэцэрхэж, би газрын эздийг араатан махчин, цус сорогч бясаа гэхчлэн хэлэхгүй муухайгаар хэлнэ. Ийшвар өнгөн дээрээ эцгийнхээ талыг барин өмгөөлөн тулдаг байсан боловч үнэн чанартаа газрын эздийг хаацайлж нэг их хүч тавьдаггүй байлаа. «Хүн болгон яаж адилхан байх вэ дээ. Дээр доор, их бага гэж л байсан юм, байх ч болно. Ямар нэгэн хууль дүрэм, хавчил шахалтаар тэгшлэн засчихна гэдэг ч хэцүү юм байгаа биз дээ» гэдэг л байж билээ.
Маргаан хурцдаад хор хөдлөөд ирэх үед ч би бүр түүнийгээ хамаагүй үгсээр лантуудна. Ийшвар маань ялагдсан үедээ ч гэсэн инээмсэглэдэг байлаа. Энэ тухайд гэвэл би түүний уурлаж байхыг огт үзээгүй. Учир нь, тэр өөрийнхөө талыг буруутай нь лавтай гэж ойлгодог байсан биз...
