МАРТИН АНДЕРСЕН НЕКСЕ
(1869 — 1954)
Данийн зохиолч, коммунист, данийн коммунист намыг үндэслэгч. Амьдралынхаа сүүлийн жилүүдийг БНАГУ-д өнгөрүүлсэн.
Дэлгэрэнгүйг Wiki-гээс
«Байлдан дагуулагч Пелле», «Хүний бяцхан үр — Дитте», «Улаан Мортен» гэдэг гурвал роман туурвисан нэрт зохиолч М. А. Нексег зөвхөн Дани орон төдийгүй, дэлхийн олон улс орны уншигчид сайн мэддэг болсон билээ.
Чулуучны хүү малчин, барлаг, зарц, гуталчин, барилгачин, сонин худалдагч, багш, сэтгүүлч зэрэг олон янзын ажил хийж ард түмнийхээ амьдралыг нэвтэрхий мэддэг болсон энэ зохиолчийн бүтээл амьдралд хайртай хаа газрын хүн бүхний анхаарал сонирхлыг зүй ёсоор татдаг юм.
М. А. Нексе амьдралынхаа хамгийн сүүлчийн зохиолоо «Хүн төрөлхтний төлөө тэмцэж байгаа хүн бүхэнтэй би ямагт хамт» гэж нэрлэсэн нь санамсаргүй хэрэг биш юм. Тэр өгүүлэлдээ: «Энх тайван гэдэг ажиллаж хөдөлмөрлөхийн тулд, энх тайван гэдэг баярлан бахархаж байхын тулд, энх тайван гэдэг ахуй амьдралыг улам саруул сайхан болгохын тулд хэрэгтэй» гэж хүн төрөлхтөнд хандан гэрээсэлжээ.
Эрин зуун улиран өнгөрөвч Данийн алдарт их бичгийн хүн М. А. Нексейн нэр үүрд үлдэж, түүний бүтээсэн хүнлэг энэрэнгүй баатрууд нь олон түмэнд үлгэр дуурайл болсоор байх болно.
Түмэн зовлон, мянган бэрхийг хатамжлан туулж, хүний төлөө зүрх сэтгэлээ дуусан дуустал зориулсан эцэггүй, бутач охин Диттен аж амьдралыг тусган харуулсан «Хүний бяцхан үр — Дитте» гэдэг алдарт роман 1968 онд монгол хэлээр хэвлэгдэн гарч манай уншигчдын дуртай номын нэг болсон юм.
Эх сурвалж : "Хүүхэд залуучуудын нэвтэрхий толь - 3" (1988 он, УБ)
