Дэмчигийн БАДАРЧ
Сэтгүүлч, орчуулагч Дэмчигийн Бадарч 1937 онд Завхан аймгийн Сантмаргац сумын нутагт төржээ.
Бага, дунд сургууль дүүргэж, 1965 онд М. В. Ломоносовын нэрэмжит Москвагийн Улсын их сургуулийг сэтгүүлч-редактор мэргэжлээр төгссөн байна.
Д. Бадарч 1965—1986 онд Улсын хэвлэлийн газарт редактор, ерөнхий редакторын орлогч, 1986—1991 онд ЗХУ-ын «Прогресс» хэвлэлийн газарт монгол хэлний ном хэвлэлийн хариуцлагатай редактор зэрэг ажил хийж явжээ.
Д. Бадарч «Орос-монгол ярианы дэвтэр» (1998) зэрэг бүтээл туурвиж, Ирина Левченкогийн «Тулалдаант жилийн тууж» (1970), В. И. Лениний 12 боть зохиол, «Хүүхэд, залуучуудын нэвтэрхий толь» зэрэг хорь шахам ном орчуулж, бусдын бичсэн 90 орчим номыг редакторласан байна.
Тэрээр улсын хэвлэлийн газарт хорь гаруй жил ажиллахдаа олон залуу ажилтныг ном хэвлэл редакторлах ажилд сургаж дадлагажуулсан өргөн мэдлэг, арвин туршлагатай редактор, улс төрийн ном хэвлэлийн томоохон орчуулагч юм.
Эх сурвалж: “Л.НОРОВСҮРЭН “СЭТГҮҮЛ ЗҮЙ” (21 боть зохиол)-ийн VII боть “МОНГОЛЫН СЭТГҮҮЛЧИД-1”-ээс
