Бүрнээбаярын БИРВАА
Сэтгүүлч, орчуулагч Бүрнээбаярын Бирваа 1929 онд Завхан аймгийн төв Завханмандалд төржээ.
Бага, дунд сургууль дүүргэж, 1962 онд Герман улсын Берлин хотын Нийгмийн Ухааны Институтийг эдийн засагч мэргэжлээр төгссөн байна. Тэрээр бас «БНМАУ дахь нөхөн үйлдвэрлэлийн процесст хөдөө аж ахуйн гүйцэтгэж буй үүрэг» сэдвээр эдийн засгийн ухааны дэд эрдэмтний зэрэг хамгаалжээ.
Б. Бирваа 1951 оноос «Үнэн» сонинд орчуулагч - сэтгүүлч, 1963 оноос МАХН-ын Төв Хорооны дэргэдэх Нийгмийн Ухааны Институтэд Улс төрийн номын редактор, ахлах редактораар олон жил ажиллажээ.
Б. Бирваа нэрд гарсан редактор, сэтгүүлч төдийгүй, чадварлаг орчуулагч юм. Тэрээр К. Марксын «Хөлсний хөдөлмөр ба капитал: цалин, үнэ, ашиг», В. И. Лениний «Империализм бол капитализмын дээд шат мөн» зэрэг номыг орчуулж, К. Маркс, Ф. Энгельс нарын гурван боть «Түүвэр зохиол», В. И. Лениний 12 боть «Түүвэр зохиол»-ын орчуулгын редактораар ажилласан байна.
Тэрээр гол төлөв улс төр, эдийн засгийн чиглэлийн олон арван ном, өгүүлэл орчуулсны гадна К.Марксын алдарт “Капитал” зохиолыг орчуулахад амьдралынхаа ихэнх хугацааг зориулсан байна.
Б. Бирваа “Капитал”-ын нэгдүгээр ботийг 1963—1977 онд, хоёрдугаар ботийг 1978—1982 онд, гуравдугаар ботийг 1989 онд орчуулж дуусаад хэвлэлд бэлтгэж байтал зах зээлийн харилцаанд шилжиж Нийгмийн ухааны институт уг бүтээлийг хэвлүүлж чадахаа больжээ. Түүнээс 10 жилийн дараа буюу 1999—2000 онд “Капитал”-ын тэрхүү монгол орчуулгыг “Соросын сан” ивээн тэтгэж хэвлүүлсэн байна.
Эх сурвалж: “Л.НОРОВСҮРЭН “СЭТГҮҮЛ ЗҮЙ” (21 боть зохиол)-ийн VII боть “МОНГОЛЫН СЭТГҮҮЛЧИД-1”-ээс
