Абуль-Фараж Бар-Эбрей
(1226—1286)
Абуль-Фараж Бар-Эбрей бол Дундад зууны үеийн Сирийн уран зохиолын шалгарсан төлөөлөгч, сонгодог зохиолчдын нэг, олон даяар таашаасан бичгийн их хүн байв. Анагаах ухаан, одон орны судлал, гүн ухаан, түүх, хэл бичиг, хэлний шинжлэл зэрэг шинжлэл судлалын олон салбарт хамаарах хэд хэдэн чамбай ном зохиол туурвин бүтээсэн, энэ өргөн их мэдлэг боловсролтой хүн, бас сирийн христос шашинтны дунд дэлгэрсэн Яковитуудын урсгалын тэргүүн хэмээгдэх өндөр хэргэм зүүж явжээ.
Абуль-Фаражийн эцэг нь монголын булаан эзлэгч цэргийн жанждын нэгний нь ордны эмч явсан тул Абуль-Фараж удаан хугацааны туршид эцгээ даган, бүхий л дайн байлдаанд оролцон явжээ. Антиохия, Триполис хотод байх үедээ анагаах ухаан хийгээд урнаар илтгэхүйн зүйг шамдан судалж, Мараг хотод байхдаа одон орны судлалыг шохоорхон оролдож, Мараг хотын нэр цуунд гарсан одон орны оргилд ажиллаж байжээ. Өмнөд Ази, Ар Кавказаар хөндлөн гулд явж, Мелитен, Халеб, Губос, Багдад, Мосуль бас бус өөр хотод очих үедээ Абуль-Фараж бололцоо л гарвал, оновчтой үг хэллэг хийгээд цэцэн сургаал, зугаатай түүх хийгээд наргиантай яриа тэмдэглэж авсаар, бүр сүүлдээ ард түмний бүтээл аман, бичгийн зохиол нь түүний гол хорхойтдог зүйл болжээ.
Тэр бээр өрнө, дорнын олон хэл мэддэг байсан нь эртний соёл иргэншлийн цэлмэг оюуны эрдэнэсийн санг онгойлгох түлхүүр болж өгсөн учраас өөрийнхөө олж үзсэн бүхий л эх бичгээс эцэж цуцахыг үл мэдэн уудлан авдаг байжээ. Тийм ч учраас бүтээл туурвилд нь өнө эртний ба дундад эртний үеийн зар цуутай гүн ухаантан араб хэл зүйч, перс түүхчид, грек тоочид эртний еврейн цэцэн мэргэн хүмүүс болон Гиппократ ба Хонейн ибн Исхак, Гален ба Диоскорид зэрэг урьд эртний нэртэй нэртэй эмч отчоос эш татсан зүйл арвин тохиолддог байна.
Дэлгэрэнгүйг эндээс
