Ороны Тлейхан
(1923 — 1982)
Монгол Улсын төр, нийгмийн нэрт зүтгэлтэн, барилгын салбарын тэргүүлэх удирдагч, Монгол Улсын гавьяат барилгачин О. Тлейхан нь 1923 онд Баян-Өлгий аймгийн Улаанхус сумын Цагаан чулуу хэмээх газар төрсөн.
Тэр бээр 1947 оны 9 сараас 1951 оны 5 сарын дунд хүртэл МҮЭТЗ-ийн “Хөдөлмөр” сонины хариуцлагатай эрхлэгч хийж байсан.
1962 – 1982 он хүртэл 20 жилийн турш Барилга, барилгын материалын үйлдвэрийн яамны сайдаар ажиллаж, энэ хугацаанд Монгол орны барилгын үйлдвэрлэл, дэд бүтцийг эрчимтэй хөгжүүлэхэд онцгой хувь нэмэр оруулсан билээ.
Тэрээр “Абайн зам” номын хэсгийг орчуулснаас гадна 1954 онд хэвлэгдсэн "монгол – казак толийг" редакторлалцжээ.
Дэлгэрэнгүйг Wiki-гээс
Улс төрч, сэтгүүлч Ороны Тлейхан 1923 онд Баян-Өлгий аймгийн Улаанхус сумын нутагт төржээ. Тэрээр бага, дунд сургуулиар дамжиж 1942—1944 онд Намын шинэ хүчний дээд сургууль, 1957-1961 онд ЗХУ-д Коммунист намын дээд сургууль, 1962—1966 онд МУИС-ийн Барилгын инженерийн ангид эчнээгээр суралцаж төгссөн байна.
О. Телейхан ухамсарт амьдралынхаа тодорхой хэсгийг сэтгүүлчийн хөдөлмөрт зориулсан хэвлэл мэдээллийн удирдах ажилтан, авьяаслаг сэтгүүлч байлаа. Тэрээр МҮЭ-ийн төв хэвлэл «Хөдөлмөр» сонины эрхлэгчээр ажиллах хугацаандаа ажилчин ангийн хөдөлмөр бүтээлийг алдаршуулах, үйлдвэрлэлийн тэргүүн туршлага, шинэ санаачилга, оновчтой саналыг аргачлан бичиж нийтийн хүртээл болгох арга барилд сэтгүүлч хамт олны хүч мэдлэгийг дайчлан, чиглүүлж удирдахын үлгэр жишээг үзүүлж байсныг ахмад сэтгүүлчид дурсан ярьдаг.
Тэрээр хожим Улаанбаатар хотын Намын хорооны дарга, Барилга, барилгын материалын үйлдвэрийн яамны сайд зэрэг нам, улсын өндөр албыг хашиж байлаа.
Эх сурвалж: "Л. НОРОВСҮРЭН “СЭТГҮҮЛ ЗҮЙ (21 боть зохиол)”-ийн “VIII БОТЬ. МОНГОЛЫН СЭТГҮҮЛЧИД-II” Улаанбаатар хот, 2019 он" номоос
