Абилтайн Минис
(1928-2012)
Академич. Түүхийн шинжлэх ухааны доктор (ScD), профессор
1928 онд Баян-Өлгий аймгийн Ойгор сум, одоогийн Улаанхус суманд мэндэлсэн.
1938—1944 онд 7 жилийн дунд сургууль, 1951—1954 онд оройн их сургууль, 1954—1955 онд ЗСБНКУ-ын Алматы хотын Багшийн дээд сургуулийн түүхийн факультетын нэгдүгээр курст онцсайн суралцаад дараагийн 1955- 1956 оны хичээлийн жилд мөн Алматы хот дахь Казахын улсын их сургуулийн түүхийн багш мэргэжил эзэмшсэн байна. 1964—1967 онд Москвад Нийгмийн ухааны аспирантурт суралцаж, түүхийн ухааны дэд эрдэмтэн, 1973 онд Түүхийн шинжлэх ухааны доктор (ScD)-ын зэрэг тус тус хамгаалжээ.
1944 оны 7 дугаар сараас 1945 оны 8 дугаар сар хүртэл Баян-Өлгий аймгийн ХЗЭ-ийн хорооны сурагч, пионерын хэлтсийн зааварлагч, 1945 оны 8 дугаар сараас 1946 оны 8 дугаар сар хүртэл Баян-Өлгийн “Хөгжил" сонины эрхлэгч, мөн сараас 1947 оны 7 дугаар сар хүртэл ЕБС-д багш, мөн сараас 1950 оны 8 дугаар сар хүртэл аймгийн Гэгээрлийн хэлтсийн сургуулийн байцаагчаар ажиллажээ.
А. Минис Улаанбаатар хотод шилжин ирж 1950—1954 оны 9 дүгээр сар хүртэл Улсын хэвлэх үйлдвэрт хянан боловсруулах хэлтэст орчуулагчаар (монголоос казах, казахаас монгол руу) ажиллажээ. 1958 оны 7 дугаар сараас Эдийн засгийн дээд сургуульд, 1960—1962 онд Намын дээд сургуулийн түүхийн тэнхимийн багш, 1962 оны 7 дугаар сараас 1964 оны 9 дүгээр сар хүртэл Намын түүхийн институтэд дэд ажилтан, 1967 оны 5 дугаар сараас 1976 оны 6 дугаар сар хүртэл Намын түүхийн институтийн эрдэм шинжилгээний хэлтэс, тасгийн эрхлэгч, мөн сараас 1981 оны 7 дугаар сар хүртэл тус институтийн захирлын үүрэг гүйцэтгэгч, мөн үеэс 1990 оны 6 дугаар сар хүртэл институтийн эрдэм шинжилгээ эрхэлсэн нэгдүгээр орлогч захирлаар ажиллаж байгаад институтийг мөн сард Намын Төв Хорооны дэргэдэх Эрдэм шинжилгээний төв болгон цомхотгож, бүтэц бүрэлдэхүүн, зорилго чиглэлээр нь өөрчлөхөд ажил үүргээсээ чөлөөлөгдөн 1991 онд ШУА-ийн Түүхийн хүрээлэнгийн шинэ түүхийн секторт, улмаар Монгол Улсын Цагаатгах ажлыг удирдан зохион байгуулах Улсын комиссын дэргэдэх Судалгааны төвийн эрдэм шинжилгээний ажилтнаар ажиллаад 1992 онд гэр бүлийн хамт Казахстан Улсын Туркстан хотод шилжин суурьшиж, тэндэх Хожа Ахмет Иасауигийн нэрэмжит их сургуульд багшилж, 2012 онд тэндээ нас эцэслэжээ.
