Лувсандашийн Бадарч
1919-1960
Зохиолч, яруу найрагч Л. Бадарч 1919 онд Халхын Түшээт Хан аймгийн Илдэн гүний хошуу, одоогийн Төв аймгийн Баянцогт сумын нутаг Нэмнээт хэмээх газар төржээ.
1935 онд бүрэн бус дунд сургууль, 1938 онд Багшийн сургууль төгсөж, 1941-1945 онд Улсын хэвлэх үйлдвэрт хянагчаар ажиллаж байв.
1937 оноос уран бүтээлээ эхэлж “Октябрийн туяа”, “Баатарлаг явдал”, “Авхайн морь”, “Унага” зэрэг олон өгүүллэг, ёгт үлгэр, шүлэг найраглал бичжээ.
Л. Бадарч хүүхдэд зориулж «Хонь, тойглох үг» гэдэг холбоо шүлгийг 1944 онд бичиж «Залуучуудын үнэн» сонинд нийтлүүлснээс хойш хүүхдэд зориулж, хэд хэдэн зохиол бичжээ. Түүний бичсэн «Хүжийн гал» (1947), «Алим» (1952), «Унага» (1954) зэрэг зохиолууд нь тусгай ном болж хэвлэгджээ.
1945 оноос "Үнэн", "Хөдөлмөр", "Тоншуул" зэрэг сонин сэтгүүлийн газар ажиллаж байсан.
1956 онд анхны нь түүвэр хэвлэгдэж, шилмэл зохиолын түүвэр нь 1963 онд хэвлэгдсэн байна.
Л. Бадарч нь орчин үеийн Монголын уран зохиолын хошин шог зохиолын төрлийг үүсгэн туурвигчдын нэг байсан бөгөөд улс төрийн хошин шог зохиол голлон бичиж байсан юм.
