Нарангийн ТЭРБИШ (1899-1959)
Монголын Зохиолчдын Хорооны гишүүн, бэлэн цэцэн, ардын ерөөлч Нарангийн Тэрбиш 1899 онд одоогийн Төв аймгийн Өнжүүл сумын нутагт мэндэлсэн байна.
Монголын ард түмний алдарт ерөөлчдийн нэг Нарангийн Тэрбиш, залуу бага наснаасаа бэлэн цэцэн үгтэй, онцын авьяаслаг хүн байсан учир үлгэр домог, ерөөл магтаал хэлэхийг сонирхон оролдсоор ард олны дотор сайн ерөөлч гэж магтагдан, тэдний хайр хүндэтгэлийг биедээ татжээ. 1948 онд Монголын Зохиолчдын Хороо, БНМА Улсын Урлагийн Хэрэг Эрхлэх Хорооноос зарласан, ерөөлч магтаалч нарыг шалгаруулах уралдаанд ардын ерөөлч Тэрбиш орон нутгаасаа шалгаран ирж, «Монгол Зөвлөлтийн ард түмний их нөхөрлөл» гэсэн сайхан ерөөл хэлж, уралдааны нэгдүгээр суурийг эзэлсэн байна. Түүнээс хойш ерөөлчийн билэг авьяас, уран бүтээл нь улам өрнөн нэмэгдэж, олон сайхан ерөөл магтаал туурвин зохиосон нь сонин сэтгүүлд хэвлэгдэж, радиогоор удаа дараа нэвтрүүлж байгаагийн дээр 1950 онд түүний бүтээлийг эмхэтгэн тусгай ном гаргасан байна.
Түүнийг Алтан гадас одонгоор шагнаж, 1948 онд Ардын ерөөлч цол олгожээ.
Н. Тэрбиш 1959 оны 8-р сарын 26-ны өдөр нас баржээ.
