ЦАХИМ НОМ

Д. Сэнгээ

Төрийн шагналт, яруу найрагч ДАШЗЭВЭГИЙН СЭНГЭЭ 1916 онд Сэлэнгэ аймгийн Хушаат сумын нутагт төржээ. Улаанбаатар хотын багш нарыг бэлтгэх сургууль, Москва хотноо М. Горькийн нэрэмжит утга зохиолын дээд сургууль төгсгөжээ. «Эх орон» (1945), «Манай дуу» (1945), «Өвгөн партизаны яриа» (1953), «Тагтаа» (1951), “Түүдгийн дэргэд”, “Цолмон” зэрэг шүлэг, найраглал, «Аюуш» (1946) тууж зэрэг зохиолуудыг нь манай хүүхдүүд сайн мэднэ. Д. Сэнгээ «Тагтаа» шүлэг, «Өвгөн партизаны яриа» гэдэг найраглал, «Аюуш» тууж бичсэн учир 1947, 1954 онд төрийн шагналаар 2 удаа шагнагдсан юм.

"Хүүхдийн уран зохиолын дээж" номоос

 

Д. Сэнгээ 1916.5.9-нд Сэлэнгэ аймгийн Хушаат суманд төржээ. Яруу найрагч, жүжиг, үргэлжилсэн үгийн зохиолч, орчуулагч. Чойбалсангийн хошой шагналтан.

1936 онд Улаанбаатар хотноо багш нарыг бэлтгэх сургууль, 1951 онд Москва хотноо А. М. Горькийн нэрэмжит Утга зохиолын дээд сургууль төгсжээ. “Жаргалант" хэмээх том сангийн аж ахуйн намын хорооны нарийн бичгийн дарга, улсын драмын театрын утга зохиолын тасгийн эрхлэгчээр тус тус ажиллаж байв. 1943-1946 онуудад Монголын зохиолчдын эвлэлийн хорооны нарийн бичгийн дарга, 1954-1959 онд зохиолчдын хорооны даргаар ажиллаж байсан. Д. Сэнгээ БНМАУ-ын Ардын Их Хурлын депутатаар хэд хэдэн удаа сонгогдож МАХН-ын их хурлуудад төлөөлөгчөөр оролцож Төв хорооны гишүүнээр сонгогдож байв.

1932 оноос эхлэн уран зохиол бичих болжээ. Д. Сэнгээ бол орчин үеийн монголын уран зохиолын томоохон төлөөлөгч бөгөөд олон талын үлэмжийн авьяас билигт зохиолч билээ. Түүний бүтээл нь өөртөө тавих өндөр шаардлага, утга зохиолын уран чадвараа улам дээшлүүлэн сайжруулах байнгын эрмэлзэлтэй байсан онцлогтой юм. Түүний туурвисан бүтээлүүдийн дотор дайныг эсэргүүцсэн иргэний, эх оронч уянгын яруу найргийн дээж болсон шүлэг, ард түмний дунд өргөн түгэн дэлгэрсэн уянгын дуунууд, Улсын дуурь бүжгийн театрын тайзан дээр олон жил тоглогдож ирсэн “Үнэн” дуурийн цомнол зэрэг бий. В. И. Лениний тухай монголын зохиолчдын зохиолуудын дотор Д. Сэнгээгийн бичсэн “Өвгөн партизаны яриа" шүлэг нь онцгой байр суурь эзэлдэг юм.

Д. Сэнгээ монголын залуу зохиолчдод ихээхэн анхаарал халамж тавьж байсан. Орчин үеийн авьяаслаг зохиолчид Л. Түдэв, С. Эрдэнэ, Б. Явуухулан, Ц. Гайтав, С. Дашдооров, Д. Гомбожав, Д. Маам, Д. Пүрэвдорж нар өөрсдийгөө Д. Сэнгээ багшийн шавь нар гэж үздэг нь зүй ёсны юм.

Д. Сэнгээгийн зохиол бүтээлүүд орос болон Зөвлөлт Холбоот Улсын бусад олон хэлэнд удаа дараа орчуулагдан хэвлэгджээ.

"МОНГОЛЫН УРАН ЗОХИОЛЫН ДЭЭЖИС-108" цувралаас

Зохиолч (орчуулагч)-ийн номууд

Өнөөдөр: 1107
Сүүлийн 7 хоног: 34508
Сүүлийн 1 сар: 199734
Нийт хандалт: 3159364