Чарльз Диккенс
(1812 – 1870)
Английн шүүмжлэлт реализмын хамгийн том төлөөлөгч бөгөөд нийгмийн сэдэвт олон романаараа дэлхийд алдаршсан зохиолч юм.
Дэлгэрэнгүйг Wiki-гээс
ДИККЕНС Ч. (1812—1870)
Английн шүүмжлэлт реализмын том төлөөлөгч Чарльз Диккенс Өмнөд Английн усан буудлын хот Портсмутэд жижиг албан хаагчийн гэрт төрж, хүүхэд насаа сургууль соёлгүй уйтгартай өнгөрөөжээ. Дөрвөн хүүхэдтэй эцэг эхийн амьдрал хүнд байж, мөнгөгүй учраас хүүгээ сургуульд оруулж чадсангүй. Тэгээд бяцхан хүү Чарли гутлын тосны үйлдвэрт ажилчин болж, өдөрт арван хоёр цаг ажилладаг байжээ. Удалгүй шүүхийн өмгөөлөгчийн ажилтай болсон залуу Чарли, ядуусын аж байдлыг дүрсэлсэн тэмдэглэл, найруулал бичиж, Боз гэдэг нууц нэрээр хэвлүүлдэг болжээ.
24 настайд нь «Бозын найрууллууд» хэмээх ном нь хэвлэгдэж, Лондоны амьдралыг дэлгэр харуулсан сайн бүтээл гэж үнэлэгдсэн байна. Ч. Диккенс сонин учралаар зохиолч болох замыг олжээ. Нэгэн зураач хүү анчны хөгтэй явдлын тухай шог зураг зураад сайхан тайлбар бичүүлэх зохиолч хайж байтал Ч. Диккенс тааралджээ. Тэрхүү зургийн тайлбарыг бичих явцдаа уг үйл явдлаар том зохиол бичих санаа төрж «Пикквикийн клубын хойчийн тэмдэглэл» гэдэг анхны романаа 25 насандаа бичжээ.
Ч. Диккенсийн уран бүтээлийн гол сэдэв нь ноёлогч анги, хөдөлмөрчин олны хоорондын эвлэршгүй зөрчлийн үндэс болсон хөрөнгө, хөдөлмөр хоёрын зөрчил юм. Түүний хоёр дахь роман нь «Оливер Твистэд тохиолдсон адал явдал» юм. Энэ романы гол баатар өнчин хүүд тохиолдсон явдлаар капитализмын үнэн нүүр царай, түүний ядууст хэрхэн ханддаг байдлыг илчлэн харуулжээ. Түүнээс хойш бичсэн «Николас Никльби», «Мартин Чезльвит», «Домби, хүү хоёрын пүүс», «Дэвид Копперфилд», «Хүйтэн байшин», «Бэрх үе», «Бид бүгдийн найз» зэрэг арван таван роман нь 1839— 1865 оны хооронд хэвлэгдэн гарчээ. Түүнээс гадна долоон том түүвэр гарчээ.
Ч. Диккенсийн романууд Английн уншигчдын сонирхлыг татаад зогсоогүй хэвлэгдсэн даруйдаа олон оронд орчуулагдан таржээ. Ч. Диккенс өөрийн бүтээлүүддээ 1500 гаруй хүний дүрийг уран сайхнаар дүрслэн гаргажээ. Тиймээс түүнийг оросын зохиолч И. Н. Гончаров «роман бичигчдийн багш», А. М. Горький «Хүнийг хайрлах эрдмийг гаргууд эзэмшсэн хүн» гэж үнэлж байжээ. Ч. Диккенс хүнийг хайрлах, хүнлэг нинжин сэтгэлээ роман, туужууддаа гойд сайхан шингээдэг байсан учраас түүний зохиолын баатрууд хүн төрөлхтний хойч үеийг өөдрөг үзэлд ямагт уриалан дуудаж байдаг юм.
Ч. Диккенс бол туйлбартай реалист зохиолч байлаа. Тэрбээр английн ардчилсан соёлд үнэт хувь нэмэр болсон шилдэг сайхан бүтээлүүдээрээ ноёлогч ангийн бурангуй явдлыг илчлээд зогсоогүй, шударга ариун нийгмийн төлөө ард түмний хүсэл эрмэлзлийг илэрхийлж байсан юм.
Ч. Диккенсийн «Дэвид Копперфилд», «Оливер Твист» зэрэг зохиолыг нь манай уншигчид төрөлх хэлээрээ амтархан уншсаар байгаа билээ.
Эх сурвалж : Хүүхэд залуучуудын нэвтэрхий толь -3 (1988 он)
