Владимир Карпович Железников
(1925 — 2015)
Орос-зөвлөлтийн хүүхдийн зохиолч, кино зохиолч. ЗХУ-ын төрийн хошой шагналт (1974, 1986), ОХУ-ын урлагийн гавьяат зүтгэлтэн (1995).
Дэлгэрэнгүйг эндээс
Владимир Железников бага залуу наснаас амьдралын эрээн барааныг үзсэн зохиолч мөн. Эцэг нь цэргийн хүн байсан бөгөөд эцгийнхээ хамт хил дээр орших Беларусь, Балтикийн хотуудад сууж байлаа. Дараа нь тэд дүрвэн нүүж, Железников их буучийн дунд сургуульд, дайн дууссаны дараа М. Горькийн нэрэмжит утга зохиолын дээд сургуульд суралцаж төгссөн байна.
Гучин таван настайд нь анхны ном нь хэвлэгдэн гарчээ.
Железниковын тууж, өгүүллэгүүд, ер бүх зохиолд нь орчин үеийн амьдрал туссан байдаг. Түүний зохиолын баатрууд нь өнөөдрийн охид хөвгүүд уншигч та бүхний үе тэнгийнхэн билээ. Гэвч тэдний хажуугаар бас өөр олон баатрууд, тухайлбал идэр залуу, хижээл настан, тэр ч байтугай өтгөс буурлууд ч бий. Тэд бүгдээрээ өнгөрснөө үргэлж дурсан санаж байна. Арван таван насандаа сүүлчийн дайнтай нүүрээрээ учирсан Железников хожим нь тэр дайныг огт мартдаггүй нь түүний уран бүтээлээс илхэн харагддаг.
