Гобсекийн өөрийн нь сүүлчийн үг, хаалгач хөгшин авгайн хэлснийг би санаад, хоёр, гуравдугаар давхрын өрөөнүүдэд орж үзэхээр шийдээд түлхүүрүүдийг авч гарав. Анхны нэг тасалгааг нээж ормогц, хөдөө нутгийн харамч хүмүүс жишээг нь харуулдаг, ховдог шунахай сэтгэлд хэмжээ хязгаар гэж байдаггүйг нүдээрээ үзэж, утгагүй юм гэж урьд бодож явсан үгсийн тайлбарыг сая олж билээ. Гобсекийн насан эцэс болсон өрөөний хажуугийн тасалгаанд галууны татсан элэг, төрөл бүрийн хүнсний зүйлс, дун хорхой, сахалт загас зэрэг маш их юм ялзран гэмтсэний өмхий үнэрт би заяатай л муужирч унасангүй. Энд тэндгүй л өт буцлан шаагьж, ялаа батгана харанхуйлж байв. Тэнд овоолттой янз бүрийн хэлбэртэй авдар, хайрцагтай юм, хунз хунз цай, баглаатай, хүүдийтэй бараа харагдана. Тэд цөм сүүлийн үед хээл хахуульд ирсэн бололтой Гобсекийн нэр дээр Гавраар дамжин ирсэн олон баглаа хөвөн, модон савтай элсэн чихэр, олон торх ром, кофе, индиго гэдэг будаг, тамхи гэх мэт колони орны төрөл бүрийн барааг тээвэрлэж ирүүлсний дагуур бичгүүд пийшин дээрх мөнгөн царан дээр багсайтал хураалттай харагдлаа. Тэр тасалгаанд гоёмсог ширээ сандал, мөнгөн эдлэл, дэнгийн голт, гар зураг, ваар сав, ном, хуйлсан модон барын жаазгүй сайхан зураг зэрэг ховор сонин юмаар дүүрэн байлаа. Энэ бүх үнэт эд хогшил ганцхан бэлгэд ч ирсэн биш, харин гол төлөв өрийн барьцаанд аваад тэр хэвээрээ үлдсэн нь дамжиггүй. Сүлд тэмдэг буюу үг үсэгтэй гоёмсог хайрцаг, сав, ширээний гоё сайхан бүтээлэг, алчуур, таних тэмдэггүй ховор буу зэвсэг ч байлаа. Хүний гар хүрч байсан бололтой нэг номыг дэлгэн үзсэн чинь завсраас нь мянга мянган франкийн дэвсгэр олон гарч ирлээ. Рембрандтын уран гараар зурагдсан байвал зохих шуналт тэр голланд хүний ухаан жолоогүй цуглуулж нуусан алтыг олохоор би аар саар юмсыг нь хүртэл нарийвчлан үзэж, шал, хана, тааз цонхыг нэгд нэгэнгүй нэгжихээр шийдлээ. Би хууль цаазын ажил хийж явсан бүх амьдралдаа ховдог шунал, хачин зан хоёр тийм үр дүнд хүргэснийг хэзээ ч үзээгүй байсан юм. Гобсекийн унтлагын өрөөнд эргэж ороод түүний энэ бүх баялаг аажмаар яаж хуримтлуулсан баримт бичгийг ширээн дээрээс олов.