Ганган Сумъяа, ганган Сумъяа л гээд байдаг, ер нь юугаараа ганган юм бэ? гэж уншигч та надаас асуу л даа. Эх нь цэргийн эмнэлэгт цагаан хэрэглэлийн угаагчаар дөч шахуу жил ажилласан өндөр Чагцал гуай шүү дээ. Чагцал гуайг одоо харахад залуудаа том алаг нүдтэй, бүдүүн хар гэзэгтэй, гунхсан гуалиг цагаан хүүхэн байсан даа гэж хэн ч бодно. Харин Сумъяа бол чацархуу, хөмсөг нүд, царайны өнгө нь аргагүй л эхийгээ дуурайсан ер сайхан залуу. Өө хэлэх хүнд үл ялих хүүхэн шинжтэй юм уу даа гэмээр.

Ажил төрөлтэй сайн эхийн ачаар гэдэс өлсөх, гар даарах, царай дарах, хувцас ноорохыг үзээгүй хорин хоёр нас хүрээд байгаа хархүү. Нийслэл хотын боловсон шуурхай залуусын хувцас хунар, янз хэлбэрийн эхний л эгнээнд зуузай холбож явахаас, Сумъяа хоцорч сүүлдэнэ ч гэж ярихгүй шүү.

Өмдний түрий, цамцны хормой, гутлын хоншоор, пальтоны өргөн, урт богино янз, өмдний тохиромж мэтийн том зүйл битгий хэл, битүү халимагийн долгион оруулсан самналт, тослолт, зангианы хавчаар, ханцуйны товч, ядам хурууны бөгж, энгэрийн тэмдэг, эвэр хүрээтэй хүрэн шил, алтан хүрээтэй цагаан шил, шармал оосортой швейцар цаг, автомат үзэг, харандаа, янжуурын техникжсэн асаагуур, түлхүүрийн оосрыг хүртэл дэгжирхэх зохимжийн үүднээс сольж шилж зүүж хэрэглэдэг. Гэвч үүгээр товчилъё. Хэрвээ Сумъяагийн хорин зургаан зангиа, зун өвлийн зургаан малгайны өнгө зүс, янз маяг, түүнийгээ ямар пальто костюм, цуван дээр ямар үед яаж өмсдөгийг тодорхой бичих юм бол цаг цаас даанч их орно...