Зохиолч: Т. ДРАЙЗЕР
Орчуулагч: Ц. Гомбосүрэн
Ангилал: Америк уран зохиол
Хэвлэлийн газар: Улсын хэвлэлийн газар
Доктор Уэйн нүүр лүү нь эгц хараад:
— Хангалттай амарч, хэт ядрахгүй байвал нэг жил амьд явна. Хэрэв та биеэ маш сайн гамнаж, тайван байх журмыг сахиж чадвал жилээс илүү ч амьдарч чадна гэж мэргэжилтнүүд ярьж байна. Гэхдээ мэргэжилтнүүдийн ярих нь заавал үнэн байх албагүйг би дээр хэлсэн.
Эрүүл мэндээрээ гялалзаж явсан хүн амьдралдаа анх удаа амь насанд аюултай өвчинд нэрвэгдсэнээс үхэх цаг болсноо сонсоод ер мэгдсэнгүй.
Ганц жилээс илүү нас үлдээгүй бололтой! Бүтээлч хөдөлмөр маань ингээд дуусчээ! Ийм л учиртай бол яах ч аргагүй хэмээх бодолтойгоор Каупервуд эмчийн өрөөнөөс гарч явахдаа зөвхөн өвчиндөө сэтгэл зовоод зогсоогүй харин амьдралынхаа янз бүрийн шатанд өөртэйгээ холбоотой байсан хүмүүсийн хувь заяаны төлөө санаа ихэд зовж байжээ.
Түүний үхэл Эйлин, Беренис, Сиппенс бага хүү Фрэнк Каупервуд, анхны эхнэр Лилиан (одоо хатагтай Уйлер) олон жил уулзаагүй охин Лилиан нарын амьдралд нөлөөлөх ажээ. Каупервуд тэр охиндоо удаан жил хүрэх юм үлдээсэн амой. Санаа тавих ёстой бас өөр хүмүүс ч бий...
