Монголын дэвсгэр нутаг дээр япончуудын эзэлж байгаа газар нь уртаашаа жар гаруй километр, өргөнөөрөө арав, арван таван километр болж байв. Тагнуулчдын мэдээнээс үзэхэд энэ хэсэг газарт японы дөчин мянга гаруй цэрэг байв. Японы байрлалын урьд нүүр нь Халхын голоос гурваас зургаан километр ойролцоо дугуйрсан байлаа. Япончууд давшилт хийх гэж бэлтгэж байсан нь ил болов. Гэвч хэзээ давшихаар төлөвлөж байгаа нь тодорхой мэдэгдэхгүй байлаа.

Япончуудын зарим бэлтгэлээс нь үзвэл, үүнд өвлийн хувцас ачсан хоёр цуваа Хайлаарын буудалд ирсэн тухай тагнуулын мэдээнээс дүгнэж үзвэл япончууд өвөл байлдахаар бэлтгэж байгаа, эсвэл хориглосон газраа өвөлжөөд, хавар давших гэж байгаа бололтой байв.

Гэвч япончууд өвөлд бэлтгэж байгаа нь хүний нүд хуурч мэхлэх гэсэн хуурамч ажиллагаа байж болох байв. Тэд Дорнод Монголыг эзэлж Байгал нуур луу чиглэх зорилготой байсан тул ойрын хугацаанд гэнэт давшихаар бэлтгэж байгаа байж болох юм.

Москва байлдаанаас айж байна гэж Токиод үзэж байлаа. Үүний баталгаа болгомоор юм японы засгийн газарт зөндөө байжээ. Тухайлбал:  Дорнод Хятадын төмөр замыг худалдсан явдал, загас агнах газрыг хуваарилах хэлэлцээр дээр буулт хийсэн явдал, Амар мөрний дундад урсгалын арлуудыг хэний мэдэлд байлгах тухай асуудлыг хэлэлцэхэд СССР-ийн гадаад явдлын ардын комиссариат хүлцэнгүй байсан явдал, энэ бүхнийг Зөвлөлт улс дайнаас айсны баталгаа гэж японы засгийн газар үзэж байв.