Данилов, Шагдар, Артемьев гурав, жижиг отрядынхаа хамт Манжийн хилийг дагаж, тал дундуур өөдөө сөөргөө, тав дахь хоног дээрээ явж байлаа. Японы эвдэн сүйтгэгчдийн бүлэг нэвтэрч магадгүй гэж хүлээж байсан газар нь Халхын голоос баруун тийш бараг зуу шахам километрт оршиж байлаа. Хилийг баримжаалж болохуйц, уул нуруу, гол мөрөн энд ер алга. Зөвхөн зураг дээрээс санаагаараа буулгасан боловч газар дээрээ үл үзэгдэх шугам байсан ба түүний дагуу, нүд алдам талаар хилийн хайчнууд хааяа нэг үзэгдэнэ. Аяллын анхны оройн амралтын үед Данилов, зургаа газар дэлгээд, гандсан тарианых шиг ногооны хатуу иш, доод талаас нь цоолчхож магадгүй гэж болгоомжлон хуруугаараа зөөлхөн дагуулан зааж, Шмелёвын хэлж өгсөн бүх зүйлийг Артемьев, Шагдар хоёрт танилцуулжээ.

Долоо хоногийн өмнө, Тамсаг булгийн цүлхгэрээр өмнө талын хилийг нэвтэрсэн, Японы үүний түрүүчийн хорлон сүйтгэх бүлэг, өмнө зүгт нэлээд хорлон сүйтгэх ажил хийснийхээ дараа наашаагаа, хойд талын хил рүү, Давст нууруудын орчмоор нэвтрэхээр төлөвлөсөн байж болох юм. Алагдсан хүмүүсийн нэгээс энэ хавийн маршрутыг тэмдэглэсэн зураг гарсан. Давст нууруудын орчим газрыг дугуйлж тэмдэглээд зургийн бичгээр “Бу” гэж бичсэн байсан энэ бол “Нуун далдлах, “Баз” гэсэн үгнүүдийн аль алинд нь ордог тэмдэг юм. Хорлон сүйтгэх түрүүчийн булгийн тухай бусад мэдээнүүд нь дөрвөн хүүр, буу зэвсэг, булчин задлах тахлын хорхой агуулсан бөгөөд хөвөнгөөр ороосон, ашиглагдаагүй хоёр хуруун шил бүхий эмнэлгийн сумк зэрэг, эд мөрийн баримтаар нотлогджээ...