Зохиолч: Хатгин Ц. Дамдинсүрэн
Орчуулагч:
Ангилал: Түүх Урлаг, соёл Угсаатны зүй Замын тэмдэглэл
Хэвлэлийн газар: Интерпресс
1956 оны тавдугаар сард Өвөр монголын Хэл бичгийн ажилтны эрдэм шинжилгээний хурлыг Хөх хотод хуралдуулсан байна. Энэ хурлаас нэгдүгээрт монголчуудын хэлний төв аялгууг баримжаа болгож нэгдсэн бичгийн хэлийг байгуулах тогтоол гаргажээ. Олон монгол аймгийн хэл аялгуу ялгавартай боловч харилцан хялбархан ойлголцдог байна. Монголчууд одоо хүртэл нэг бичгийн хэлтэй, нэг үсэгтэй байсаар ирсэн журмыг хөгжүүлж олон монгол аймгийн хэлийг харилцан ойртуулсаар монгол хэлний төв аялгууг түгээмэл аялгуу болгох зорилго тавьж байна. Хоёрдугаарт, Бүгд Найрамдах Монгол Ард Улсад хэрэглэж байгаа шинэ үсэг, шинэ үсгийн дүрмийг яг хэвээр нь авч хэрэглэхээр тогтоожээ. Ингээд Монгол Ард улсад хэвлэгдсэн шинэ үсгийн товч дүрэм, шинэ үсэгт суралцах бичиг, үсэглэл, үсгийн дүрмийн толь, монгол хэлний зүй зэрэг номыг Хөх хотод дахин хэвлэж гаргаснаас гадна шинэ үсгийн сурах бичиг, Үсэглэл, унших бичиг зэргийг өөрсдөө зохион хэвлэж байна. Одоо ажилчин, албан хаагчид, ард олныг нийтээр нь шинэ үсэгт сургаж байна. Бага дунд сургуульд 1956 оны намраас эхлэн шинэ үсгээр хичээллэж эхлэв...
