Энх тайван, хөгжил дэвшил, хүний эрх гэдэг гурван зорилго өөр хоорондоо салшгүй холбоотой бөгөөд аль ч хоёрыг нь үл тоомсорлох аваас нөгөө нэгийг нь хэрэгжүүлэх боломжгүй юм. Энэ бол миний энэхүү лекцэдээ илэрхийлэх гэж байгаа гол санаа. Надад Нобелийн Энх тайвны шагнал хэмээх сэтгэл догдлуулсан эрхэм дээд шагнал хүртээсэнд, түүнчлэн өнөөдөр та бүхний өмнө лекц унших боломж олгосонд би чин сэтгэлээсээ талархаж байна. Шагналын хорооны томьёоллыг би үнэнхүү сэтгэл ханамжтай хүлээн авсан, тэнд хүний эрхийг хамгаалах асуудлын үүргийг олон улсын урт хугацааны жинхэнэ хамтын ажиллагааны цорын ганц бат бэх үндэс гэж цохон дурдсан байна лээ. Энэ санааг би маш чухал санаа гэж бодож байгаа юм. Олон улсын итгэлцэл, харилцан ойлголцол, зэвсэг хураах болон Олон улсын аюулгүй байдал зэргийг нийгмийн нээлттэй байдалгүйгээр, мэдээллийн эрх чөлөөгүйгээр, итгэл үнэмшлийн эрх чөлөөгүйгээр, ил тод байдалгүйгээр, явдал суудлын болон аж төрөх орноо сонгох эрх чөлөөгүйгээр сэтгэхийн аргагүй гэдэгт би итгэл төгс байна...
