Зохиолч: Мариа Конопницка
Орчуулагч: Б. Ринчен
Ангилал: Польш уран зохиол
Хэвлэлийн газар: Улсын хэвлэлийн газар
Запала дэргэдээ нэг муу жаал өнчин хүүтэй, газрын хаанаас чиг түүнээ олж авсныг бүү мэд. Тэр хөөрхий цагаач нь, урьд ер орох газраа олж ядан, эндээс ч түлхүүлж, тэндээс ч хөөгдөж, биеэр нь энд тэндгүй зодуулсан хөх няц, өмссөн нь шороо шиг хар болчихсон нэг муу цамц; гэдэс нь өлсөж, дааран дагжиж, модны захад уйлж байхад нь өвгөн дайралдан өрөвдөөд, ажин харсхийгээд, нэг нулимаад, гэртээ тэврэн аваачиж, дээлээрээ ороон дулаалж, талхны булан байсныг идүүлэн, хэвтдэг вандан дээрээ унтуулсан цагаас хойш хоёулаа хамт байх болж, Антек гэдэг тэр жаал хүү, Войцехыг түшсэн нь, царс модны хожуулд хаван наалдан ургасан найлзуур шиг салшгүй болжээ...
