Зохиолч: Габриель Гарсиа Маркес
Орчуулагч: Хатагин Г. Аким
Ангилал: Гадаадын уран зохиол Үлгэр, домог Адал явдалт
Хэвлэлийн газар: Улсын хэвлэлийн газар
Нийт Макондод үхлийн гай татах хэрэг явдал Меме Буэндиагийн хүүг авчрах үед нэгэнт ойртсон байлаа. Хотынхон үймэлдэн сандралдаад, гэр бүлийн хэрүүл уруулыг анхаарахтай манатай байсан учир Фернанда энэ аятай байдлыг далимдуулж, тийм хүүхэд төрөөгүй мэт тас нуухаар шийдэв. Зээгээ авахаас өөр арга түүнд байсангүй. Угаалгын өрөөний усан санд хүүг живүүлчихье гэж дотроо шийдсэнээ яг цагаа болоход арай ч зүрх хүрэхгүй байсаар хэчнээн дургүй ч үхэн үхтлээ хүүг тэвчин байх хэрэг гарчээ. Хүүг Аурелиано Буэндиагийн урлан байсан өрөөнд түгжив. Жаал хүүг голоор сагстай хөвж явахад нь олсон юм гэж Санта Софи де ла Пьедад итгүүлж чадав. Урсула хүүгийн төрсөн нууцыг мэдэлгүй байсаар үхэх учиртай байжээ. Жаахан Амаранта Урсула урлан руу шагайн, Фернандагийн жаал хүүг хооллож байхад харсан ч сагстай хөвж явсан гэдэг ярианд үнэмшжээ. Охиныхоо амьдралыг үрж зэрлэг авирласанд нь эхнэрээсээ бүр хөндийрөөд байсан Бага Аурелиано ачтай болсноо гурван жилийн хойно л, Фернандагийн цалгардсан завшаанаар хүн гэхээсээ, нэвтэрхий толинд зурсан махчин гэмээр сэгсийсэн үстэй шалдан амьтан хорих өрөөнөөс гүйн гарч, минут хэртэй гонхонд орж ирэхэд нь л мэдсэн билээ.
Фернанда дүүрсэн хувь заяагаа ингэж балайгаар эргэнэ гэж бодож байсангүй...
