Зохиолч: Ромас Калонайтис
Орчуулагч: Н. Пүрэвдагва
Ангилал: Гадаадын уран зохиол Адал явдалт уран зөгнөл
Хэвлэлийн газар: Улсын хэвлэлийн газар
Нар хоргодох мэт алгуурхан шингэхэд бараантах тэнгэрт одод уван цуван түглээ. Райнис хуванцар замаар яаралгүй алхана. Зам дагуу Ангарагийн бүдэг улаан, зэгэл саарал цэцэгс ургажээ. Райнис тоолж таван мянга алхаад цагаа харвал гэрэлтэгч зүү Ш үсэгт дөхжээ. «Буцах болжээ. Маргааш орой бас л энэ хүрээд буцна. Цаг хугацаа, үйл явдал намайг тойрон өнгөрөөд л байдаг. Миний хийх ёстой юм, миний цаг хаа нэгтэй байх л ёстой. Арай анзааралгүй өнгөрчихсөн юм биш байгаа» гээд санаа алдав.
Тэр эргэж зогсоод тэнгэрийн хаяа ширтэв. Горгоны толгой бараг хөөрч гүйцжээ. Райнис оддыг эртний үлгэр домгийн баатраар нэрлэх тул нөхөд нь түүнийг этгээд хүн гэлцдэг. Горгоны толгойг ширтэж байснаа ирмээд «Нэгэн цагт эмгэн буурал дэлхий дээр маань над шиг нэг хачин эр мөн ийм говьд манаа хийж зогсоод, Горгоны толгойг түгших гуниглах сэтгэл хослуулан ширтэж байснаа гэгээ гэрэлд хөтлөгдөн од шингэх мандал руу алхсан гэдэг. Харин...
