Зохиолч: Камен Калчев
Орчуулагч: Б. Жамъянбаатар
Ангилал: Гадаадын уран зохиол
Хэвлэлийн газар: Улсын хэвлэлийн газар
— Нөхөд өө, партизаны ангид очихоос өмнөх амьдралынхаа жижиг сажиг зүйлээр нөхдийн цагийг дэмий үрээд яах вэ. Ууланд хэрхэн хүрч, партизаны бантангаас анх амсахдаа ямар их сэтгэл хөдөлснийг та нарт ярихгүй. Бас анхны тулалдаан дунд хэрхэн айж, анхны залхаан цээрлүүлэгчийг буудах үедээ хэрхэн тээнэгэлзэж байсан зэргийг ярихаа больё. Та нөхдөд ганцхан зүйлийг хэлье. Миний үзэн ядах үзэл бүр хэтрээд арьсны үзэл болж хувираад байв. Ичмээр юм! Гитлерчүүдтэй хамт герман гаралтай бүхнийг үзэн ядаж байв. Тэдний яриаг сонсмогц л бие зарайж эхэлнэ! «Капитал» герман хэлээр бичигдсэн, Маркс германаар ярьдаг байсан гэдэг санаанд багтахгүй байв. Уурласан хүүхэд шиг л дургүй хүрээд үзэн ядаж байлаа. Даан удалгүй партизануудын доог болж гүйцэв. Гэхэд та нөхөд миний үзлийг надаас илүү мэдэх болохоор ярихын хэрэггүй. Харин та нарыг уучилшгүй нэг зүйл бий. Миний арьсны үзлийг эмчилж эдгэрүүлэхийн оронд улам маажиж зовоодог байсан юм. Тэр ч байтугай та нараас нэг нь нүдний шилтэй өндөр горзгор болохоор франц гээд хочилчихсон байсан. Хэдийгээр царайнд минь герман төрх бий боловч над шиг үзэлтэй хүнд ямар байхыг, нөхөд минь бодоод үз л дээ...
