Гүн бишрэлийнхээ хүчээр бурхны мэлмийн нууцад нэвтрэх тавилант тэнгэрийн азтай гаргууд хүмүүсийн зориг надад байсан сан бол, бурхан өөрийнхөө бүтээсэн уяхан сэтгэлт Постниковын энэ үйлийг өөрөө ч лавтайяа таалах байсан гэж зүрхлэн таамаглаж магадгүй буй заа.
Гэтэл бишрэл минь нимгэнийх төдий эрхэм дээдийг ойлгоход ухаан мөхөстөж ертөнцийн биет юмыг л бараадах билээ. Сайн үйлийг сайн үйлийн төлөө эрхэмлэж, хариуд нь хаана ч гэлээ шан үл горилох тийм эгэл төрөлтнүүдийн тухай би боддог юм.
Өрөвч сэтгэлийн энэ ариун тэмүүлэл, мөн мадаггүй чин үнэн миний энэ өгүүллэгийн хүлцэнгүй баатрын үүнээс ч дутахгүй ариун тэвчээрийг тийм чигч, найдвартай хүмүүс бас л бүрнээ таалах болов уу хэмээн санагдана.
