Зохиолч: Веркор
Орчуулагч: Т. Төмөрхүлэг
Ангилал: Францын уран зохиол
Хэвлэлийн газар: Улсын хэвлэлийн газар
Тэр өдрөөс эхлэн герман маань шинэ маягаар орж ирдэг боллоо. Цэргийн хувцастайгаа тун ховор үзэгддэг боллоо. Хувцсаа сольчхоод хаалга цохидог зуршилтай болов. Бидэнд дайсных нь цэргийн хувцсыг нэг их үзүүлээд яах вэ гэж бодсон юм болов уу даа. Тэгээд ч энэ хувцсыг мартагнуулах гэсэн юм байлгүй. Нэг бол биднийг өөртөө дасгах гэсэн юм болов уу? Аль аль нь л байх даа. Герман, хаалга ганц нэг тогшин хариу хүлээлгүй орж ирдэг байлаа. Тэртэй тэргүй зөвшөөрөл өгөхгүй гэдгийг мэддэг биз. Даарахдаа галд ээхээр нэрэлхэлгүй орж ирдэг болов. Эл айлчлалын шалтгийг бидний хэн хэн маань андахгүй бөгөөд бидний хооронд бат тогтсон гэрээний шинжтэйг тэр герман нууж хаах гэж оролддоггүй байж. Орой болгон манайхаар хэсдэггүй байсан. Тэгэхдээ ганц удаа бидэнтэй үг дуугаралгүй гарсныг би санадаггүй л юм даа. Герман гал руу бөхийн халуу оргисон дөлд нь төрсөн биеийнхээ нэг хэсэгтэй орчих шахах ахуйдаа, үдшийн шөнийн уртад, гонгиноо дуугаа яльгүй өргөж, сэтгэл зүрхнийхээ үгийг ярьдаг сан...
