НҮБ-ын үндсэн зорилгын нэг нь "арьс үндэс, хүйс, шашин шүтлэгээр үл ялгаварлан хүний эрх, үндсэн эрх чөлөөг хүндэтгэх явдлыг сайшаан хөгжүүлэх талаар олон улсын хамтын ажиллагааг хэрэгжүүлэх" явдал байдаг.
Эл зорилгын үүднээс Нэгдсэн Үндэстний Байгууллагын Ерөнхий Ассамблей 1948 оны 12 дугаар сарын 10-ны өдөр Хүний эрхийн түгээмэл Тунхаглалыг баталсан билээ. Хүний эрх, үндсэн эрх чөлөөг нэгтгэн тодорхойлсон энэхүү Тунхаглал хүний эрхийн салбарт улс түмний баримтлах үндсэн удирдамж болсоор байна. Хүний эрхийн олон улсын хууль зүйн тулгуур баримт бичиг болох Иргэний болон улс төрийн эрхийн тухай Пакт, Эдийн засаг, нийгэм соёлын эрхийн тухай Пактыг боловсруулахдаа уг Тунхаглалыг эш үндэс болгосон юм.
