Олон түмэн ардыг эрх чөлөөтэй жаргуулахын тулд онолт их журмыг үүсгэсэн нь зоригт нөхдийн минь онцгой тусламж эрэх чухал хэргийн учир одоохон мордохын үдлэг баярыг хүргэнэ. Түм түмэн ардыг зовлонгоос ангижруулах хэрэг түргэн түргэнээр бүтэх зам нь шулуун, түмэн олныг төлөөлөн зүтгэх журмын нөхдөөр түдэх алжаалгүйгээр амар мэнд явж ирэх болтугай гэв. Эдгээр гурван нөхөд сүүг амсаж тавиад гэрээс гарч мордоход Дугаржав би мөн тэдний учрыг мэдэх нөхөр Намсрайжавын хамтаар дагалдан мордож Чингэлтэй уулын зүүн этгээд Сэлбийн голыг өгсөж эхний даваа хүртэл үдэж гарган хойш эргэж ирсэн ба мөн Дугаржав миний эхнэр Норжмаа тэдний хойноос сүү цацаж алс хол явах журмын ах нар амар мэнд явж ирэх болтугай хэмээн ерөөж өгүүлсэн билээ...
