Зохиолч: Т. ДРАЙЗЕР
Орчуулагч: Д. Лхамжав
Ангилал: Америк уран зохиол
Хэвлэлийн газар: Улсын хэвлэлийн газар
Өвлийн цагт том хотод хачин өвөрмөц юм олон үзэгддэг. Цас орсон цагт явган зам нил шавхай болж түүгээр явна гэдэг амаргүй болдог. Цас эхлээд ороход үүлтэй тэнгэр зулай дарам ойрхон санагдаад агаарт жижиг жижигхэн хөвөн хийсэх мэт харагдана. Тэгсхийгээд шавхай шалан үүсэж, хүйтэн жавар салхи үлээх нь ч бий. Хүйтэн жаварт хөсөг тэрэг хяхтнан, ажилд орох, гэртээ харихын өмнө аар саар юм хөөцөлдөхөөр сандралдан гудамжаар хөлхөлдөх мянга түмэн хүн үерийн ус шиг миегнэнэ.
Байгалийн ба аж амьдралын эрхээр өвлийн хотын салшгүй нэгэн хэсэг болсон хүн зарим хороо хоринд байдгийг чухам тийм өдөр л олж харж болно. Тэд тэнгис далайн дотор сүрэг загасны хойноос хөөцөлдөн яваа цахлай л гэсэн үг. Дутагдаж гачигдахын зовлон тэр олон хүнийг хооронд нь адил төстэй ойр дотно, ямар нэг хэмжээгээр нэг ангийн улс гэж үзэхээр болгосон ажээ. Тэд бие бялдрын хувьд туйлдсан төдийгүй оюун ухааны хувьд ч туйлджээ. Газар эхээс заяасан эд баялгийн хувьд гэвэл тэдэнд олдсон нь юу байх вэ, юу ч алга...
